Diwygiadau i’w cynnwys yn y Rheoliadau Cymorth i Fyfyrwyr a rheoliadau cysylltiedig ar gyfer blwyddyn academaidd 2022 i 2023 (Cymhwystra ar gyfer Gwladolion Wcreinaidd ac aelodau o’u teuluoedd)

Mae Rheoliadau Addysg (Cyllid Myfyrwyr) (Cymhwystra ar gyfer Gwladolion Wcreinaidd ac Aelodau o’u Teuluoedd) (Diwygiadau Amrywiol) (Cymru) 2022 (“Rheoliadau 2022”) yn cael eu drafftio ar hyn o bryd ac unwaith y byddant wedi eu gwneud, byddant yn gwneud personau y rhoddir caniatâd iddynt aros o dan Gynllun Wcráin y Swyddfa Gartref (fel y’i diffinnir isod) yn gymwys ar gyfer cymorth i fyfyrwyr, statws ffioedd cartref, a’r cap ar ffioedd dysgu israddedig wrth gychwyn neu barhau cwrs ar neu ar ôl 1 Awst 2022.

Mae Rheoliadau 2022, sydd i ddod i rym ar 1 Awst 2022, yn gymwys i flynyddoedd academaidd sy’n cychwyn ar neu ar ôl 1 Awst 2022 ac maent yn gwneud y newidiadau fel y nodir isod.

Mae’r Swyddfa Gartref wedi sicrhau bod tri llwybr mewnfudo ar gael i’r rheini sydd wedi eu dadleoli gan y gwrthdaro yn Wcráin: y Cynllun Teuluoedd o Wcráin, y Cynllun Noddi Cartrefi i Wcráin a’r Cynllun Estyn Cyfnod Gwladolion Wcráin, y’u gelwir gyda’i gilydd yn Gynlluniau Wcráin. Mae pedwerydd llwybr ar gael, lle rhoddir caniatâd i aros y tu allan i’r Rheolau Mewnfudo.

Bydd diwygiadau yn cael eu gwneud i reoliadau i wneud darpariaeth i’r rhai y rhoddir caniatâd iddynt aros o dan y Cynlluniau Wcráin neu y rhoddir caniatâd iddynt aros y tu allan i’r Rheolau Mewnfudo i fod yn gymwys ar gyfer cymorth i fyfyrwyr israddedig, ôl-raddedig ar gyrsiau Meistr, a doethurol, ac i fod yn gymwys ar gyfer statws ffioedd cartref a’r cap ar ffioedd dysgu, yn unol â chategorïau eraill sy’n seiliedig ar warchod. 

Bydd person yn gymwys ar gyfer cymorth i fyfyrwyr israddedig neu ôl-raddedig, statws ffioedd cartref, a’r cap ar ffioedd dysgu israddedig mewn cysylltiad â’r flwyddyn academaidd sy’n cychwyn ar neu ar ôl 1 Awst 2022 os yw’r person hwnnw:

• wedi cael caniatâd i aros o dan y Cynlluniau Wcráin
• wedi cael caniatâd i aros y tu allan i’r Rheolau Mewnfudo am reswm sy’n gysylltiedig â’r gwrthdaro yn Wcráin
• yn arfer preswylio yn y Deyrnas Unedig a’r Ynysoedd ac nad yw wedi peidio â phreswylio felly er pan roddwyd caniatâd iddo aros o dan y Cynllun Wcráin neu y tu allan i’r Rheolau Mewnfudo
• yn arfer preswylio yng Nghymru ar ddiwrnod cyntaf blwyddyn academaidd gyntaf y cwrs.

Mae diwygiad yn cael ei wneud i alluogi person y rhoddir caniatâd iddo aros o dan y Cynlluniau Wcráin yn ystod blwyddyn academaidd i ddod yn gymwys ar gyfer cymorth i fyfyrwyr, statws ffioedd cartref a chap ar ffioedd dysgu cyn belled â’i fod yn bodloni’r holl ofynion eraill, gan gynnwys y gofynion diwrnod cyntaf.

Bydd darpariaeth ‘terfynu’ yn cael ei hychwanegu at y Rheoliadau Addysg (Cymorth i Fyfyrwyr) (Cymru) 2018 a’r Rheoliadau Addysg (Cymorth i Fyfyrwyr) (Cymru) 2017 fel na fydd person nad oes ganddo bellach ganiatâd i aros o dan y Cynllun Wcráin na chaniatâd i aros y tu allan i’r Rheolau Mewnfudo yn gymwys ar gyfer cymorth i fyfyrwyr, statws ffioedd cartref na’r cap ar ffioedd dysgu.

Y rheoliadau i’w diwygio yw:

• Rheoliadau Addysg (Ffioedd a Dyfarniadau) (Cymru) 2007
• Rheoliadau Addysg (Athrofa Brifysgol Ewropeaidd) (Cymru) 2014
• Rheoliadau Addysg Uwch (Cyrsiau Cymhwysol, Personau Cymhwysol a Darpariaeth Atodol) (Cymru) 2015
• Rheoliadau Addysg (Cymorth i Fyfyrwyr) (Cymru) 2017
• Rheoliadau Addysg (Cymorth i Fyfyrwyr) (Cymru) 2018
• Rheoliadau Addysg (Benthyciadau at Radd Ddoethurol Ôl-raddedig) (Cymru) 2018
• Rheoliadau Addysg (Cymorth i Fyfyrwyr) (Graddau Meistr Ôl-raddedig) (Cymru) 2019.

Gall darllenwyr gysylltu â Llywodraeth Cymru neu gyda’u cyswllt arferol yn y Cwmni Benthyciadau i Fyfyrwyr/Cyllid Myfyrwyr Cymru i gael rhagor o wybodaeth am gymhwystra. Gellir cysylltu â Llywodraeth Cymru ar: isadrancyllidmyfyrwyr@llyw.cymru. Rydym yn croesawu gohebiaeth yn Gymraeg neu Saesneg.