Diwygiadau i Ddogfennau Cymeradwy (WGC 010/2020)

Deddf Adeiladu 1984

Rheoliadau Adeiladu 2010

Diwygiadau i Ddogfennau Cymeradwy

1.      Mae Gweinidogion Cymru wedi rhoi cyfarwyddyd i mi dynnu eich sylw at y cyhoeddiadau canlynol: Dogfen Gymeradwy B (Diogelwch Tân), Cyfrol 1: Tai annedd argraffiad 2006 sy'n ymgorffori diwygiadau 2010, 2016 a 2020, Dogfen Gymeradwy B (Diogelwch Tân) Cyfrol 2: Adeiladau ac eithrio tai annedd argraffiad 2006 sy'n ymgorffori diwygiadau 2010, 2013, 2016, 2017 a 2020 a Dogfen Gymeradwy 7 (Deunyddiau a Chrefftwaith) argraffiad 2013 sy'n ymgorffori diwygiadau 2020.

2.      Dim ond i adeiladau a gwaith adeiladu yng Nghymru y mae'r newidiadau a wnaed i'r Dogfennau Cymeradwy yn gymwys. 

3.      Diben y Cylchlythyr hwn yw tynnu sylw at y canlynol:

i.   Diwygiadau i Atodiad A (Perfformiad deunyddiau, cynhyrchion a strwythurau) i Ddogfen Gymeradwy B (Diogelwch tân) Cyfrolau 1 a 2. Mae'r Ddogfen Gymeradwy wedi'i diwygio i atgyfnerthu'r darpariaethau ar gyfer cynnal asesiadau yn lle profion tân.

ii. Ymgorffori cynnwys y slip diwygio a nodwyd yng nghylchlythyr WGC 003/2020 ar gyfer Dogfen Gymeradwy B (Diogelwch tân) Cyfrol 1 Tai annedd, Dogfen Gymeradwy B (Diogelwch tân) Cyfrol 2 Adeiladau ac eithrio tai annedd a Dogfen Gymeradwy 7 (Deunyddiau a Chrefftwaith). WGC 003/2020

iii. Ymgorffori cynnwys y slip diwygio a nodwyd yng nghylchlythyr WG 001/2017 mewn perthynas â Dogfen Gymeradwy B (Diogelwch tân) Cyfrol 2 WG 001/2017

4.      Mewn perthynas â 3.i. uchod, mae'r Ddogfen Gymeradwy wedi'i diwygio i atgyfnerthu'r gofynion wrth ddarparu asesiadau yn lle profion tân. Mae'r diwygiad yn nodi tair ffordd o ddangos cydymffurfiaeth.

5.      Roedd y ddarpariaeth flaenorol yn rhestru nifer o ffyrdd o ddangos perfformiad, er enghraifft cyfeirio at berfformiadau enwol fel Eurocode, BR 128. Mae'r ddarpariaeth ddiwygiedig wedi cyffredinoli'r methodolegau profi, a chaiff llwybrau penodol a nodwyd yn flaenorol eu cwmpasu o fewn y tri llwybr cydymffurfio diwygiedig.

6.      Er bod llwybrau cydymffurfio presennol yn gymwys o hyd, mae'r diwygiadau i'r Ddogfen Gymeradwy yn sicrhau na ddylid ystyried asesiadau yn ffordd o osgoi prawf os oes angen un.

7.      Mae 3.ii. a 3.iii. uchod yn diweddaru'r Dogfennau Cymeradwy i gynnwys newidiadau blaenorol a wnaed i Ddogfen Gymeradwy B Cyfrolau 1 a 2 a Dogfen Gymeradwy 7 drwy gyhoeddi slipiau diwygio.

8.      Daw'r Dogfennau Cymeradwy diwygiedig i rym ar 31 Rhagfyr 2020 yn yr amgylchiadau a nodir yn yr hysbysiad ffurfiol o gymeradwyaeth yn ATODIAD A i'r Cylchlythyr hwn.

9.      Caiff cymeradwyaeth ei thynnu'n ôl ar gyfer Dogfen Gymeradwy B (Diogelwch Tân) Cyfrol 1: Tai annedd argraffiad 2006 sy'n ymgorffori diwygiadau 2010 a 2016, Dogfen Gymeradwy B (Diogelwch tân) Cyfrol 2: Adeiladau ac eithrio tai annedd argraffiad 2006 sy'n ymgorffori diwygiadau 2010, 2013 a 2016 a Dogfen Gymeradwy 7 (Deunyddiau a Chrefftwaith) argraffiad 2013 ar 31 Rhagfyr 2020 fel y nodir yn ATODIAD B i'r cylchlythyr hwn.

10.    Ymhellach i Adran 6 (3) (b) o Ddeddf Adeiladu 1984, mewn perthynas â 3.i. uchod, daw diwygiadau i Atodiad A (Perfformiad deunyddiau, cynhyrchion a strwythurau) i Ddogfen Gymeradwy B (Diogelwch tân) Cyfrol 1 a 2 i rym ar 31 Rhagfyr 2020. Nid yw'r diwygiadau yn gymwys sut bynnag lle mae hysbysiad adeiladu, hysbysiad cychwynnol neu gynlluniau llawn wedi cael eu hadneuo gydag awdurdod lleol cyn 31 Rhagfyr 2020.

11.       Yn unol ag adrannau 6(3) a (4) o Ddeddf Adeiladu 1984, mae Gweinidogion Cymru yn cymeradwyo'r diwygiadau ar ôl ymgynghori â Phwyllgor Cynghori Cymru ar Reoliadau Adeiladu.

12.    Nid yw'r cylchlythyr hwn yn rhoi cyngor ar ofynion technegol Rheoliadau Adeiladu 2010 oherwydd eir i'r afael â'r materion hyn drwy ddiwygio'r Dogfennau Cymeradwy.

Dylid anfon unrhyw ymholiadau am y Cylchlythyr hwn at:

Francois Samuel, Rheoliadau Adeiladu, Llywodraeth Cymru, Rhyd-y-car, Merthyr Tudful, CF48 1UZ.

Ffôn: 03000 628232.

E-bost: enquiries.brconstruction@llyw.cymru

Yn gywir,

Francois Samuel

Pennaeth Rheoliadau Adeiladu