Dechrau'n Deg: Tymor 1 (Ebrill i Awst 2019)

Prif bwyntiau

Roedd 22,576 o blant wedi derbyn gwasanaethau Dechrau'n Deg yng Nghymru ar ryw adeg o 1 Ebrill 2019 hyd at ddiwedd y cyfnod (31 Awst 2019). Mae’r plant a welwyd hyd yn hyn yn ystod y flwyddyn yn cynrychioli 62% o’r disgwyliad ar gyfer y flwyddyn gyfan.

Ar y cyfan roedd 20% o blant o dan 4 mlwydd oed yng Nghymru ar lwyth achosion ymwelwyr iechyd Dechrau’n Deg.

Cafodd plant Dechrau'n Deg hyd at 4 oed eu gweld, ar gyfartaledd, 2.5 gwaith yn ystod y flwyddyn hyd yma gan ymwelydd iechyd neu gan aelodau’r tîm iechyd ehangach.

Derbyniodd 98% o blant oedd newydd ddod yn gymwys i dderbyn gofal plant mewn lleoliad gofal plant Dechrau’n Deg gynnig yn ystod y flwyddyn hyd yma. Mae’r nifer a ddefnyddiodd lefydd gofal plant yn debygol o fod yn is na’r hyn ydyw mewn gwirionedd yr adeg hon o’r flwyddyn oherwydd mewn rhai awdurdodau lleol ni ellir canfod y defnydd ar gyfer rhai plant sy’n derbyn cynnig mewn tymor penodol hyd nes bod y lle wedi ei gymryd yn ffurfiol (yn y tymor dilynol).

Nodyn

Nodwch mai gwybodaeth rheoli heb ei dilysu yw’r data a dderbyniwyd hyd at Tachwedd 4, 2019; fe’i darperir i roi diweddariad ar y rhaglen wrth i’r flwyddyn fynd yn ei blaen. Bernir bod y data o werth digonol ar lefel Cymru i’w gyflwyno yma, ond mae data awdurdodau lleol yn parhau i gael ei ddilysu  trwy’r flwyddyn ac nid yw wedi ei gynnwys yma.

Bydd data manylach ar gyfer y flwyddyn gyfan, wedi ei ddilysu, yn cael ei ryddhau ar gyfer y cyfnod 2019-20 yn ei gyfanrwydd yn natganiad ystadegol mis Gorffennaf 2020; bydd hyn yn cynnwys data ar gyfer awdurdodau lleol unigol. Pan fydd darlun cyflawn o’r flwyddyn ar gael, gallai data gael ei adolygu yn unol â’r hyn sy’n briodol.