Datganiad Ysgrifenedig: Ymgynghori ar y dreth gyngor: Prisio Tai Amlfeddiannaeth

Heddiw, rwy'n lansio ymgynghoriad ar Reoliadau drafft sy'n cynnig newidiadau i'r ffordd y mae Tai Amlfeddiannaeth yng Nghymru yn cael eu prisio a'u bandio at ddibenion y dreth gyngor, a Rheoliadau drafft sy'n cynnig bod perchnogion yn parhau i fod yn atebol am y dreth gyngor. 

Mae tai amlfeddiannaeth yn darparu ffynhonnell bwysig o lety i nifer o bobl o wahanol gefndiroedd ledled Cymru. Mae teuluoedd, gweithwyr proffesiynol ifanc a myfyrwyr yn byw yn y math hwn o lety ac mae'n cynnal rhai o'r grwpiau mwyaf agored i niwed a difreintiedig, fel y rhai ar incwm isel. Hefyd, ers ychydig o flynyddoedd, defnyddir tai amlfeddiannaeth o ansawdd uchel er mwyn darparu llety fforddiadwy.

Bydd y newidiadau arfaethedig yn sicrhau y bydd tai amlfeddiannaeth yn cael eu prisio fel eiddo unigol ar gyfer bandio y dreth gyngor lle bo hynny'n briodol, gan greu cysondeb ar draws y sector a rhoi sicrwydd i gynghorau, landlordiaid ac aelwydydd. Bydd hyn yn lliniaru'r baich gweinyddol ar gynghorau ac yn sicrhau y bydd perchnogion yn parhau i fod yn atebol am y dreth gyngor yn y ffordd arferol, yn hytrach na bod cynghorau yn bilio tenantiaid unigol sy'n meddiannu'r eiddo am gyfnod byr yn unig efallai.

Mae'r ymgynghoriad yn ceisio barn ar Reoliadau drafft er mwyn: 

• sicrhau bod tai amlfeddiannaeth yn cael eu bandio fel eiddo unigol gydag un band y dreth gyngor; a
• sicrhau bod perchennog tŷ amlfeddiannaeth yn parhau i fod yn atebol am y dreth gyngor. 

Ynghlwm wrth yr ymgynghoriad y mae dau offeryn statudol drafft a fyddai, yn amodol ar ganlyniad yr ymgynghoriad, yn disodli Gorchymyn y Dreth Gyngor (Anheddau Trethadwy) 1992 a Rheoliadau'r Dreth Gyngor (Atebolrwydd Perchenogion) 1992. Rwy'n cynnig manteisio ar y cyfle hwn i wneud deddfwriaeth newydd i Gymru yn unig er mwyn annog hygyrchedd. Fodd bynnag, i fod yn glir, dim ond ynghylch tai amlfeddiannaeth y mae'r newidiadau polisi arfaethedig i'r ddeddfwriaeth bresennol yn ymwneud â nhw, fel y nodir uchod, a dyma y mae'r ymgynghoriad yn canolbwyntio arno. 

Hoffwn gael safbwyntiau ar y cynigion a'r Rheoliadau drafft gan unrhyw un sydd â barn am y ffordd y caiff tai amlfeddiannaeth eu trin at ddibenion y dreth gyngor, gan gynnwys gan drethdalwyr, cynghorau, landlordiaid, perchnogion tai amlfeddiannaeth, tenantiaid ac unrhyw un arall sy'n dymuno rhoi sylwadau. Cynhelir yr ymgynghoriad am gyfnod o 12 wythnos a gofynnir am ymatebion erbyn 26 Tachwedd 2024. 

Gellir dod o hyd i'r ymgynghoriad yn: 

https://www.llyw.cymru/prisio-tai-amlfeddiannaeth-ddiben-treth-y-cyngor

Caiff y datganiad hwn ei gyhoeddi yn ystod y toriad er mwyn rhoi'r wybodaeth ddiweddaraf i'r Aelodau. Os bydd yr Aelodau am imi wneud datganiad pellach neu ateb cwestiynau am hyn pan fydd y Senedd yn dychwelyd, byddwn yn falch o wneud hynny.