Datganiad Ysgrifenedig: Seilwaith Profi COVID-19

Mae ein seilwaith profi yn parhau i ddatblygu i gefnogi profion torfol ar gyfer pobl symptomatig ar draws poblogaeth Cymru.  

Yn ein strategaeth brofi a gyhoeddwyd yn yr haf gwnaethom nodi’r angen i sicrhau bod digon o allu profi i alluogi i bawb sydd â symptomau gael prawf ar y diwrnod hwnnw, yn ddelfrydol.

Mewn partneriaeth â Llywodraeth y DU, rydym wedi cynllunio i ehangu ystod a chyrhaeddiad ein seilwaith profi cenedlaethol. Mae hyn yn cynnwys sefydlu 27 o Safleoedd Profi Lleol yn ogystal â’r:

• Safleoedd Profi Rhanbarthol – 8 ar draws Cymru yng Nghasnewydd, Glynebwy, Caerdydd, Abercynon, Abertawe, Caerfyrddin, Llandudno a Glannau Dyfrdwy.
• Unedau Profi Cymunedol – 19 ar draws Cymru mewn amryw o leoliadau.
• Unedau Profi Symudol – 18 uned ar draws Cymru gyda rhai’n cael eu defnyddio ar draws y Byrddau Iechyd Lleol ac eraill yn cael eu defnyddio ar gyfer ymateb cyflym.
• Pecynnau Profi Gartref – gan gynnwys mynediad at borth penodol ar gyfer cartrefi gofal.

Mae’r Safleoedd Profi Lleol yn safleoedd profi cerdded i mewn ar gyfer ein cymunedau ac yn cynyddu’r mynediad at brofion ar gyfer ein cymunedau mwyaf agored i niwed ac wedi’u tangynrychioli. Bydd y gwaith o ehangu’r Safleoedd Profi Lleol yn cynnwys agor 15 o safleoedd profi lleol cerdded i mewn cyn y Nadolig mewn ardaloedd allweddol ar draws Cymru, a lansio 12 arall dros y misoedd nesaf wedi inni gwblhau’r cynlluniau gyda byrddau iechyd lleol ac awdurdodau lleol. Rydym hefyd yn cyflwyno 9 Uned Brofi Symudol, ar ben yr 19 uned sydd eisoes yn weithredol, i sicrhau bod gan bob bwrdd iechyd lleol un uned symudol y gellir ei defnyddio ym mhob ardal awdurdod lleol.

Mae’r Safleoedd Profi Lleol a fydd ar agor cyn diwedd 2020 yn cynnwys:  

Rydym hefyd yn trafod gyda Bwrdd Iechyd Prifysgol Bae Abertawe i ganfod a fydd yn bosibl i osod Safle Profi Rhanbarthol ychwanegol yn yr ardal yn ogystal â’r 8 yr ydym eisoes wedi’u lleoli ar draws Cymru.

Bydd y buddsoddiad hwn yn rhoi’r gallu a’r cadernid angenrheidiol inni yn ystod misoedd y gaeaf ac ar gyfer ein hanghenion i’r dyfodol. Rydym eisiau sicrhau bod profion ar gael yn rheolaidd ac yn aml ac rydym yn parhau i weithio gyda’r Byrddau Iechyd Lleol, awdurdodau lleol a’n partneriaid yn y trydydd sector i ddatblygu’r gallu i estyn allan yn effeithiol at gymunedau ar draws Cymru. Mae hyn yn cynnwys canolbwyntio ar ardaloedd mwy difreintiedig, cymunedau mwy gwledig neu anghysbell a grwpiau â nodweddion gwarchodedig.

Yn ogystal â gwella ein gallu i brofi pobl gyda symptomau rydym hefyd yn datblygu ein dull gweithredu a’n cymorth i bobl heb symptomau gael mynediad at brofion llif unffordd sy’n canfod presenoldeb antigen feirysol COVID-19 o sampl swab ac sy’n rhoi canlyniad o fewn 20 i 30 munud. Mae hyn yn cynnwys sefydlu Safleoedd Profi Asymptomatig mewn sefydliadau addysg uwch ac ysgolion, a chynnig profion cymunedol ym Merthyr Tudful a Chwm Cynon Isaf.

Fe fyddwn yn parhau i gryfhau a datblygu ein dull gweithredu o ran profion i sicrhau bod gennym safleoedd profi cynaliadwy sy’n hyblyg ac yn ymateb i anghenion yn lleol, ac yn gallu addasu i dystiolaeth a ddaw i’r amlwg a datblygiad technolegau newydd.