Datganiad Ysgrifenedig - Sefydlu Grŵp Gorchwyl a Gorffen yr Eisteddfod Genedlaethol, ei Aelodaeth a’i Gylch Gwaith

Yn yr Eisteddfod Genedlaethol yn 2012 fe holais a ddylai’r Eisteddfod Genedlaethol foderneiddio.  Rwy’n bwriadu sefydlu Grŵp Gorchwyl a Gorffen i drafod opsiynau er mwyn cyflwyno argymhellion i mi ar sut y mae cyflawni hyn.  Ni fydd cylch gwaith y Grŵp Gorchwyl a Gorffen yn cynnwys trafodaeth ar newid rheol Gymraeg yr Eisteddfod.  Rwy’n falch o gyhoeddi bod y canlynol wedi cytuno i fod yn aelodau o’r grŵp: 

• Roy Noble, Cadeirydd
• Peter Florence 
• Yr Arglwydd Dafydd Elis-Thomas AC
• Eirlys Pritchard Jones
• Sioned Wyn Roberts 
• Nia Parry 
• Bethan Elfyn
• Aran Jones 
• John Pritchard 
• Daniel Evans 
• Ali Yassine
• Sian Eirian

Bydd y grŵp yn ystyried:

• Beth yw’r manteision a’r anfanteision o adleoli’r Eisteddfod bob blwyddyn rhwng De a Gogledd Cymru ac i leoliadau newydd bob tro? Beth fyddai manteision ac anfanteision modelau eraill? A ddylid dilyn cylch pedair blynedd gan leoli’r Eisteddfod ar ddau safle parhaol, un yn y Gogledd-orllewin a’r llall yn y Gorllewin, a theithio rhwng y De a’r Gogledd am yn ail ar gyfer y ddwy flynedd arall?;

• A allai lleoliadau parhaol i’r Eisteddfod ysgogi’r ardaloedd hynny yn economaidd, gan hybu twristiaeth ddiwylliannol, ac adlewyrchu y celfyddydau yng Nghymru ar eu gorau?

• Beth yw manteision ac anfanteision y model presennol a ddefnyddir i drefnu wythnos yr Eisteddfod a chystadlaethau’r wythnos dan reolaeth y Pwyllgor Gwaith a’r Llys?  Beth fyddai manteision ac anfanteision modelau eraill? Er enghraifft, yn y dyfodol a ellid trefnu wythnos yr Eisteddfod ar wahân i’r cystadlaethau er mwyn gwella profiad ymwelwyr ac atyniad yr Eisteddfod fel un o ddigwyddiadau diwylliannol pwysicaf Cymru?  

• Sut mae cynnal a chefnogi ymrwymiad, brwdfrydedd a gweithgarwch y gwirfoddolwyr ledled Cymru?  

• Sut mae sicrhau ein bod yn elwa i’r eithaf ar yr oes ddigidol hon wrth roi sylw i’r Eisteddfod yn y cyfryngau?  

• Sut mae sicrhau bod yr Eisteddfod yn cynnig profiad cyfoethog i ymwelwyr newydd, gan gynnwys pobl o gefndiroedd di-Gymraeg, gan gynnwys, er enghraifft, gwell arwyddion, amserlenni digwyddiadau a chymorth gyda offer cyfieithu?    

• Sut gall yr Urdd a’r Eisteddfod Genedlaethol weithio yn agosach gyda’i gilydd i rannu gwasanaethau ac adnoddau?  

• Sut mae manteisio ar ffynonellau eraill o gyllid refeniw i’r Eisteddfod?

• Sut mae cynyddu niferoedd ymwelwyr i’r Maes yn ystod wythnos yr Eisteddfod, gan dargedu pobl ifanc a theuluoedd yn benodol?

Bydd y Grŵp yn derbyn tystiolaeth gan nifer o sefydliadau, gan gynnwys darlledwyr, yr Eisteddfod Genedlaethol a’r Urdd.  Bydd yn adrodd i mi ym mis Medi 2013.