Datganiad Ysgrifenedig - Gyngor Partneriaeth Cymru a’r Cynllun Llywodraeth Leol

Ar 24 Hydref 2012 cynhaliwyd cyfarfod cyntaf Cyngor Partneriaeth Cymru (y Cyngor Partneriaeth) wedi'i ddiwygio. Mae'r agenda a'r papurau ar gael ar wefan Llywodraeth Cymru . Yn dilyn adolygiad o’r Cyngor Partneriaeth yn ystod 2011, cytunodd y Cyngor y dylid diwygio rhai o elfennau ei aelodaeth a’i ddulliau gweithredu. Bellach, mae'r aelodaeth yn dwyn ynghyd y gwasanaethau cyhoeddus ehangach, gan gynnwys cynrychiolwyr o'r awdurdodau lleol, yr heddlu, y gwasanaeth tân, cynghorau cymuned, ac am y tro cyntaf y gwasanaeth iechyd. Mae amlder y cyfarfodydd ffurfiol wedi gostwng i un cyfarfod blynyddol yn gynnar yn yr hydref. Ond mae is-grŵp wedi'i sefydlu’n benodol i oruchwylio’r diwygio, a bydd yr is-grŵp hwnnw'n gallu cwrdd yn amlach, ac ar fyr rybudd, os bydd angen. Yr enw a roddir ar yr is-grŵp hwn yw Grŵp Cyflawni'r Diwygio. Mae strwythurau ariannol y Cyngor Partneriaeth wedi'u hailwampio hefyd, fel bod y berthynas rhwng Llywodraeth Cymru a Llywodraeth Leol yn un sy'n fwy clir ac yn ychwanegu gwerth. 

Dyma aelodau'r Cyngor Partneriaeth ar ei newydd wedd:

• Prif Weinidog Cymru
• Y Gweinidog Llywodraeth Leol a Chymunedau (Cadeirydd)
• Y Gweinidog Cyllid ac Arweinydd y Tŷ 
• Y Cwnsler Cyffredinol 
• Y Gweinidog Addysg a Sgiliau
• Gweinidog yr Amgylchedd a Datblygu Cynaliadwy
• Y Gweinidog Iechyd a Gwasanaethau Cymdeithasol
• Y Gweinidog Busnes, Menter, Technoleg a Gwyddoniaeth
• Y Gweinidog Tai, Adfywio a Threftadaeth
• Y Dirprwy Weinidog Amaethyddiaeth, Bwyd, Pysgodfeydd a Rhaglenni Ewropeaidd
• Y Dirprwy Weinidog Sgiliau
• Y Dirprwy Weinidog Plant a Gwasanaethau Cymdeithasol
• Y Cynghorydd Bob Wellington (cynrychiolydd ar ran Llywodraeth Leol ar gyfer ardal Gwent)
• Y Cynghorydd Anthony Christopher (cynrychiolydd ar ran Llywodraeth Leol ar gyfer ardal Cwm Taf)
• Y Cynghorydd Neil Moore (cynrychiolydd ar ran Llywodraeth Leol ar gyfer ardal Caerdydd a'r Fro)
• Y Cynghorydd Ali Thomas (cynrychiolydd ar ran Llywodraeth Leol ar gyfer ardal Bae'r Gorllewin)
• Y Cynghorydd Jamie Adams (cynrychiolydd ar ran Llywodraeth Leol ar gyfer ardal y Canolbarth a'r Gorllewin) 
• Y Cynghorydd Dilwyn Roberts (cynrychiolydd ar ran Llywodraeth leol ar gyfer ardal y Gogledd) 
• Y Cynghorydd Mel Nott (Llywydd Cymdeithas Llywodraeth Leol Cymru)
• Y Cynghorydd Aaron Shotton (llefarydd Cymdeithas Llywodraeth Leol Cymru ar Gyllid ac Adnoddau)
• Y Cynghorydd Tudor Davies (yn cynrychioli'r Awdurdodau Tân ac Achub)
• Y Cynghorydd Gwyn Hopkins (yn cynrychioli Awdurdodau'r Heddlu)
• Mr Chris Martin (yn cynrychioli'r Byrddau Iechyd Lleol ac Ymddiriedolaethau'r GIG)
• Y Cynghorydd Mair Stephens (yn cynrychioli'r cynghorau cymuned)
• Y Cynghorydd E Caerwyn Roberts (yn cynrychioli Awdurdodau'r Parciau Cenedlaethol) 

Yn ychwanegol, bellach mae'n bosibl i bartneriaid gwasanaethau cyhoeddus allweddol – sef Swyddfa Archwilio Cymru, Cymdeithas Llywodraeth Leol Cymru, TUC Cymru, a Chyngor Gweithredu Gwirfoddol Cymru – fynd i'r cyfarfodydd fel sylwedyddion.

Prif gyfrifoldebau’r Cyngor Partneriaeth yw:

• hybu trafodaethau rhwng Gweinidogion Cymru a Llywodraeth Leol ar faterion sy'n effeithio ar lywodraeth leol yng Nghymru, yn unol ag Adrannau 72 a 73 o Ddeddf Llywodraeth Cymru 2006; a
• chynnig atebolrwydd gwleidyddol ar y cyd am gamau i wella effeithiolrwydd ac effeithlonrwydd gwasanaethau cyhoeddus.

Bydd y Cyngor Partneriaeth yn caniatáu i ni gael y trafodaethau gwleidyddol ar y cyd y bydd eu hangen yn ystod y blynyddoedd nesaf, a bydd y trafodaethau hynny’n rhoi'r cyfle i ni  wneud rhai o'r penderfyniadau anodd y bydd gofyn i ni eu gwneud.   

Yn unol ag Adran 73 o Ddeddf Llywodraeth Cymru 2006, mae gofyn i Weinidogion Cymru baratoi cynllun yn esbonio sut y byddant, wrth arfer eu swyddogaethau, yn cynnal ac yn hyrwyddo llywodraeth leol yng Nghymru. Gofynnir i Weinidogion Cymru gyhoeddi adroddiad ar sut y cafodd y cynigion sydd wedi'u nodi yn y cynllun eu rhoi ar waith yn y flwyddyn ariannol flaenorol, a chyflwyno copi o'r adroddiad gerbron Cynulliad Cenedlaethol Cymru. 

Mae'n bleser gennyf gyflwyno'r Adroddiad Blynyddol ar gyfer 2011-12 i'r Cynulliad Cenedlaethol heddiw. Mae'r adroddiad yn tynnu sylw at nifer o'r meysydd lle y mae'r gwasanaethau cyhoeddus yn cydweithio'n llwyddiannus â'i gilydd. 

Fel y nodwyd yn yr adroddiad, cafodd Cynllun Partneriaeth presennol Llywodraeth Leol ei gyhoeddi yn 2008. Rwy'n bwriadu ailwneud y Cynllun Llywodraeth Leol yn ystod y flwyddyn ariannol hon, er mwyn iddo adlewyrchu'r sefyllfa bolisi gyfredol mewn perthynas â gwasanaethau cyhoeddus, ac adlewyrchu agenda'r Rhaglen Lywodraethu. Bydd y cynllun diwygiedig yn cael ei roi ar waith o Ebrill 2012 ymlaen, a bydd copi yn cael ei gyflwyno gerbron y Cynulliad.