Datganiad Ysgrifenedig: Ehangu lleoedd hyfforddi ar gyfer y gweithlu iechyd proffesiynol

Mae'r pandemig COVID-19 wedi tanlinellu'r angen parhaus am gynnydd yn nifer y gweithwyr iechyd proffesiynol hanfodol. Dyna pam y bydd cyllid i gefnogi addysg a hyfforddiant i weithwyr iechyd proffesiynol yng Nghymru yn cynyddu, a hynny am y seithfed flwyddyn yn olynol. Caiff £227.901m ei fuddsoddi yn 2021/22, sef cynnydd o 8.3% ers 20/21. Mae hyn yn £9.124m yn ychwanegol ar gyfer rhaglenni addysg a hyfforddiant i weithwyr proffesiynol yng Nghymru, £2.315m yn ychwanegol ar gyfer lleoedd hyfforddiant meddygol, £5.312m yn ychwanegol i hybu’r niferoedd craidd ar gyfer hyfforddiant meddygol teulu a chynnydd net o £0.762m ar gyfer hyfforddiant fferyllol ledled Cymru.

Mae hyn yn lefel uwch nag erioed o gyllid, ac fe fydd yn cael ei ddefnyddio i gynnal y nifer mwyaf erioed o gyfleoedd hyfforddi yng Nghymru. 

Rwyf yn hynod o falch o fuddsoddiad y llywodraeth hon mewn addysg a hyfforddiant i gynnal y gweithlu iechyd ar draws Cymru. Mae mwy o bobl yn gweithio i'r GIG heddiw nag a fu ar unrhyw adeg yn ei hanes, gyda phob un ohonynt yn ceisio atal problemau a gofalu am aelodau o'r gymdeithas ar draws pob cymuned yng Nghymru. Nid yw pwysigrwydd ein gwasanaethau iechyd a gofal erioed wedi bod mor amlwg ag yn ystod y naw mis diwethaf.

Mae’n hanfodol bod gweithlu’r GIG wedi’i hyfforddi’n dda ac sy'n meddu ar y sgiliau cywir er mwyn darparu gofal cynaliadwy o’r radd flaenaf i bobl ledled Cymru a gwella safonau yn ein gwasanaeth iechyd. Er gwaethaf yr heriau sy’n ein hwynebu heddiw, yn enwedig eleni gyda'r pandemig, rydym wedi parhau i fuddsoddi yn addysg a hyfforddiant gweithwyr gofal iechyd proffesiynol Cymru.

Dros y pum mlynedd diwethaf mae lleoedd hyfforddi nyrsys wedi cynyddu 72% a bydwragedd wedi cynyddu 97%. Mae tablau yn dangos y cynnydd mewn lleoedd hyfforddi ar gyfer gweithwyr iechyd proffesiynol a hyfforddiant meddygol ar gyfer 2021/22 i'w gweld yn Atodiad A.

Mae Llywodraeth Cymru wedi ymrwymo i roi i’r GIG y gweithlu y mae arno ei angen ac i sicrhau system iechyd a gofal cymdeithasol gynaliadwy fel y nodir yn Cymru Iachach.

Bydd y lleoedd hyfforddi ychwanegol hyn yn cynyddu gallu’r gweithlu i helpu’r GIG i ymateb i’r heriau sy’n ei wynebu yn awr ac yn y dyfodol.

                                                                                                                      Atodiad A

Cynllun Hyfforddi a Chomisiynu Addysg GIG Cymru ar gyfer 2021/22

Mae’r tablau canlynol yn dangos y cynnydd yn nifer y lleoedd hyfforddi ar gyfer gweithwyr iechyd proffesiynol ac ar gyfer hyfforddiant meddygol yn 2021/22.

Staff iechyd proffesiynol

Argymhellion ar gyfer Cynllunio’r Gweithlu Meddygol