Ken Skates, Ysgrifennydd y Cabinet dros yr Economi a'r Seilwaith
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Yn dilyn penderfyniad y Cabinet ddiwedd mis Mehefin, dywedais wrth yr aelodau mai ein bwriad oedd cyhoeddi crynodeb o’r diwydrwydd dyladwy a wnaed ar brosiect Cylchffordd Cymru. Rwy’n falch o gael dweud wrth yr aelodau ein bod wedi gwneud hyn. Mae copïau o’r crynodeb bellach ar gael ar wefan Llywodraeth Cymru a byddaf hefyd yn rhoi copïau yn Llyfrgell y Cynulliad.
Mae fy swyddogion wedi cwblhau’r proses o ymgynghori ag awduron yr adroddiadau diwydrwydd dyladwy ac â Heads of the Valleys Development Company Ltd. Fel y dywedais wrth yr Aelodau ym mis Mehefin, mae gwybodaeth benodol heb ei chyhoeddi gan ei bod naill ai’n destun braint gyfreithiol, yn parhau i fod yn sensitif yn fasnachol neu’n wybodaeth bersonol o dan Ddeddf Diogelu Data.
Mae’r adroddiadau ariannol ac adeiladu a gyhoeddwyd yn tynnu sylw at y risgiau a amlygwyd gan ein cynghorwyr, gan gynnwys y risg i arian cyhoeddus a fyddai wedi’i greu drwy gynnig y warant y gofynnwyd amdani. Mae’r adolygiad o’r dystiolaeth o’r effaith ar yr economi yn ystyried y manteision i Gymru a honnwyd gan y datblygwr.
Rydym bellach yn symud ymlaen gyda’n cynlluniau ar gyfer parc technoleg gwerth £100 miliwn a fydd yn sbarduno twf yn yr economi ar draws Blaenau’r Cymoedd. Mae’r cynlluniau hyn yn mynd rhagddynt yn dda ac er mwyn cychwyn y broses, cymeradwyais yn gynharach yr wythnos hon gyllid ar gyfer adeilad diwydiannol 50,000 troedfedd sgwâr newydd yng Nglynebwy.
http://gov.wales/topics/businessandeconomy/welsh-economy/circuit-of-wales/?lang=cy