Datganiad Ysgrifenedig - Diweddariad Llywodraeth Cymru ar ‘Hwyluso’r Drefn’ – gweithredu’r argymhellion ar gyfer rheoleiddio ffermio’n well

Mae blwyddyn wedi mynd heibio ers cyhoeddi adroddiad Gareth Williams ‘Hwyluso’r Drefn’ gydag 74 argymhelliad i Lywodraeth Cymru ar gyfer gwella’r fframwaith rheoleiddio ffermio yng Nghymru. Mae’r argymhellion yn bellgyrhaeddol ac mae eu llwyddiant yn ddibynnol ar bartneriaeth glós rhwng Llywodraeth a’r diwydiant ffermio. Rwyf i wedi bod yn gweithio gyda swyddogion a’r diwydiant i weithredu’r argymhellion ac rwy’n credu bod y gwaith yn mynd rhagddo’n dda.

Gwahoddais Gareth yn ôl yn yr hydref i adolygu’r cynnydd ac i asesu a oedd y fframwaith rheoleiddio wedi gwella o gwbl. Mae wedi bod yn cwrdd â ffermwyr a chynrychiolwyr o’r byd amaeth i drafod y baich rheoleiddio a’r newidiadau sydd wedi’u gwneud dros y flwyddyn ddiwethaf. Rwy’n edrych ymlaen at dderbyn casgliadau ac argymhellion Gareth, a gyflwynir i mi mewn adroddiad fis Chwefror.  

Cyhoeddir ymateb Llywodraeth Cymru i’r adroddiad cyn toriad y Pasg.