Mark Drakeford AS, Ysgrifenydd y Cabinet dros Gyllid a’r Gymraeg
Heddiw, rwy’n cyhoeddi Cynllun Gweithredu Cymraeg 2050 ar gyfer 2025-26. Mae’r ddogfen hon yn disgrifio sut y byddwn yn parhau i weithredu amcanion strategaeth Cymraeg 2050: Miliwn o siaradwyr yn ystod blwyddyn ariannol 2025-26.
Mae’r Cynllun Gweithredu yn adlewyrchu’r camau sydd wedi’u cynnwys yn Rhaglen Waith 2021-2026 Cymraeg 2050, yn ogystal â’n Rhaglen Lywodraethu. Mae’r Cynllun yn amlinellu’r camau y bydd y Llywodraeth yn eu cymryd yn ystod blwyddyn ariannol 2025-26 er mwyn gweithredu’r ddau brif darged a ganlyn:
- Nifer y siaradwyr Cymraeg i gyrraedd 1 miliwn erbyn 2050.
- Canran y boblogaeth sy’n siarad Cymraeg bob dydd, ac sy’n gallu siarad mwy nag ychydig eiriau o Gymraeg, i gynyddu o 10% (yn 2013-15) i 20% erbyn 2050.
Eleni, byddwn yn parhau i weithredu o dan dair thema ein strategaeth iaith sef:
- Cynyddu’r niferoedd sy’n gallu siarad Cymraeg.
- Cynyddu’r defnydd o’r Gymraeg.
- Creu amodau ffafriol – seilwaith a chyd-destun.
Ein gweledigaeth yw bod y Gymraeg yn perthyn i bawb yng Nghymru – y bobl sy’n gallu ei siarad yn hyderus, y rhai sy’n dysgu’r iaith a’r rhai sy’n siarad ychydig eiriau yn unig. Bydd ein gwaith eleni felly’n canolbwyntio ar y byd addysg drwy gyfrwng Bil y Gymraeg ac Addysg (Cymru), defnydd cymunedol o’n hiaith a thechnoleg iaith. Byddwn yn parhau i weithio ar draws amrywiol bortffolios Gweinidogol a chydag ystod eang o randdeiliaid ar hyd a lled Cymru a thu hwnt er mwyn symud ymlaen ar ein taith tuag at filiwn o siaradwyr Cymraeg a dyblu’r nifer ohonom sy’n defnyddio’r Gymraeg bob dydd.