Datganiad Ysgrifenedig: Cyfraddau Treth Incwm Cymru (CTIC) – Cyhoeddi Cytundeb Lefel Gwasanaeth ac Adroddiad Blynyddol CThEF (2022)

Mae Deddf Cymru 2014 yn rhoi’r pŵer i’r Senedd osod Cyfraddau Treth Incwm Cymru (CTIC).

Mae Cytundeb Lefel Gwasanaeth yn bodoli rhwng Llywodraeth Cymru a Chyllid a Thollau Ei Fawrhydi (CThEF) ar gyfer gweithredu CTIC. Mae’r Cytundeb Lefel Gwasanaeth yn amlinellu’r gofynion, y graddfeydd amser a’r mesurau perfformiad. Bydd cadw at y Cytundeb Lefel Gwasanaeth yn sicrhau y rhoddir gwasanaeth o ansawdd cyson i drethdalwyr yng Nghymru ac yn galluogi CThEF a Llywodraeth Cymru i ddiwallu eu cyfrifoldebau priodol yn ymwneud â gweithredu treth incwm Cymru.

Mae swyddogion Llywodraeth Cymru a CThEF wedi adolygu’r Cytundeb Lefel Gwasanaeth i sicrhau ei fod yn addas i’r diben o hyd. Fel rhan o’r broses hon, gwnaed rhai newidiadau a diwygiadau. Mae’r newidiadau’n cynnwys:

• Diweddariadau cyffredinol yn egluro rolau a gofynion mewn meysydd megis rhannu data ac adolygiadau chwemisol
• Amserlenni wedi’u diweddaru ar gyfer cyhoeddiadau ystadegol
• Newidiadau i weithrediad fframwaith CTIC o ran costau y gellir ailgodi tâl amdanynt.

Mae’r Cytundeb Lefel Gwasanaeth yn ei gwneud yn ofynnol i CThEF gyhoeddi adroddiad blynyddol ar weithrediad CTIC. Mae’r adroddiad diweddaraf ar gyfer blwyddyn dreth 2021-22 hefyd wedi ei gyhoeddi. Mae’r adroddiad yn nodi gwybodaeth am sut mae CThEF yn gweinyddu CTIC, gan gynnwys:

• Nodi trethdalwyr Cymru a gwaith sicrwydd mewn perthynas â hynny;
• Gweithgareddau cydymffurfio;
• Casglu refeniw CTIC a rhoi cyfrif amdano;
• Gwasanaeth a chymorth i gwsmeriaid;
• Data ar gyfer pennu cyfraddau a llunio rhagolygon CTIC;
• Llywodraethiant a throsolwg ar gyfer CTIC;
• Costau gweithredu CTIC ac ailgodi tâl am gostau CThEF.

Mae’r dogfennau ar gael yma:

Cytundeb Lefel Gwasanaeth ar gyfer gweithredu Cyfraddau Treth Incwm Cymru gan CThEF - GOV.UK (www.gov.uk)

Adroddiad Blynyddol 2022 ar Gyfraddau Treth Incwm Cymru - GOV.UK (www.gov.uk)