Vaughan Gething AS, Gweinidog yr Economi
Fel y gŵyr yr Aelodau, aeth Baglan Operations Limited a Grŵp Cwmnïau Baglan i ddiddymu gorfodol ar 24 Mawrth, yn dilyn cyfnod o drallod ariannol.
Mae Baglan Operations Limited yn gyfrifol am waith cynhyrchu trydan Baglan, sydd bellach ar gau a nhw hefyd yw'r unig gyflenwad trydan i Barc Ynni Baglan drwy rwydwaith gwifrau preifat, sydd wedi'i eithrio gan drwydded.
Penodwyd derbynnydd swyddogol o Wasanaeth Ansolfedd Llywodraeth y DU fel yr hylifydd a bydd yn cyflawni ei ddyletswyddau diddymu statudol i sicrhau bod gweithrediadau'r cwmni'n cael eu dirwyn i ben yn ddiogel, gan gynnwys mynd i'r afael ag unrhyw beryglon iechyd a diogelwch ar y safle. Mae'r derbynnydd swyddogol yn gwneud y safle'n ddiogel ar hyn o bryd, gyda'r bwriad o ddatgymhwyso neu werthu'r orsaf bŵer cyn gynted ag y bo'n ymarferol.
Yn y cyfnod interim hwn, er bod y safle'n cael ei wneud yn ddiogel, mae'r trydan drwy'r rhwydwaith gwifrau preifat yn cael ei gynnal gan y derbynnydd swyddogol er budd y cwsmeriaid, y busnesau a'r sefydliadau sy'n dibynnu ar y rhwydwaith gwifrau preifat am eu hynni.
Fodd bynnag, mae pawb yn cydnabod bod angen ateb hirdymor o ran ynni pe bai'r derbynnydd swyddogol yn penderfynu cau'r rhwydwaith gwifrau preifat, sy'n parhau y tu allan i gyflenwr fframwaith rheoleiddio'r dewis olaf yn y DU.
Er bod y cyflenwad o bŵer i fusnesau yn fater masnachol rhwng y cyflenwr ynni a'i gwsmeriaid, mae Llywodraeth Cymru yn cydnabod yr effaith sylweddol y byddai unrhyw darfu ar bŵer yn ei chael ar gwsmeriaid a'r economi leol ehangach.
Am y rheswm hwnnw, mae'n bleser gennyf gyhoeddi bod Llywodraeth Cymru wedi contractio Western Power Distribution, fel gweithredwr y rhwydwaith dosbarthu trwyddedig
lleol, i ddylunio ac adeiladu rhwydwaith newydd er budd Parc Ynni Baglan, ar gost o tua £3m.
Bydd y mesur hwn yn darparu seilwaith newydd i'r parc ynni, gan roi'r cyfle i gwsmeriaid yr effeithir arnynt drwy ddiddymu'r orsaf bŵer yr opsiwn i gysylltu â rhwydwaith dosbarthu newydd a reoleiddir gan OFGEM.
Bydd y cam gweithredu hwn yn lleihau'n sylweddol y goblygiadau o ran costau i sefydliadau y byddai angen iddynt sicrhau cysylltiad newydd â'r grid, a sicrhau bod y rhwydwaith yn y dyfodol yn cael ei oruchwylio'n llawn.
Bydd y tasglu lleol, sydd wedi'i gynnull i ganolbwyntio ar gynllunio wrth gefn, yn cysylltu â chwsmeriaid y rhwydwaith gwifrau preifat i'w hysbysu am y penderfyniad hwn ac i fwrw ymlaen â'r trafodaethau manwl am y cysylltiadau terfynol ochr yn ochr â Western Power Distribution. Bydd y tasglu'n parhau i archwilio cymorth wrth gefn os bydd y derbynnydd swyddogol yn terfynu'r pŵer drwy'r rhwydwaith gwifrau preifat cyn i Western Power Distribution gwblhau ei waith seilwaith.
Rydym yn parhau i fonitro'r sefyllfa'n agos ac rydym yn gweithio gyda phartneriaid, gan gynnwys y Gwasanaeth Ansolfedd a Llywodraeth y DU i archwilio pob opsiwn posibl i leihau effaith unrhyw darfu ar y cyflenwad pŵer ar sefydliadau sy'n dibynnu ar y rhwydwaith gwifrau preifat.