Datganiad Ysgrifenedig: Adolygiad o Reoliadau Diogelu Iechyd (Cyfyngiadau Coronafeirws) (Rhif 5) (Cymru) 2020

Mae Rheoliadau Diogelu Iechyd (Cyfyngiadau Coronafeirws) (Rhif 5) (Cymru) 2020 yn ei gwneud yn ofynnol adolygu’r cyfyngiadau coronafeirws bob tair wythnos. Roedd angen cynnal yr adolygiad diweddaraf erbyn 3 Mehefin.  

Mae nifer yr achosion wedi’u cadarnhau o COVID-19 yng Nghymru yn parhau i fod yn is na 10 achos fesul 100,000 o bobl, sef y gyfradd isaf yn y DU. Mae hyn yn adlewyrchiad o waith caled pobl ym mhob cwr o Gymru i ddiogelu eu hunain a’u teuluoedd.

Mae ein rhaglen frechu hefyd yn parhau i symud ymlaen yn rhagorol. Mae dros 85% o’r boblogaeth sy’n oedolion bellach wedi derbyn eu dos cyntaf o’r brechlyn ac mae bron eu hanner wedi cwblhau’r cwrs o ddau ddos.

Fodd bynnag, mae ymddangosiad a lledaeniad yr amrywiolyn delta, sy’n trosglwyddo’n haws, mewn rhannau o’r DU – Gogledd-orllewin Lloegr yn benodol – yn achosi pryder. Mae ychydig llai na 100 o achosion yng Nghymru, gan gynnwys clwstwr yn sir Conwy, ond rydym yn disgwyl i’r niferoedd hyn gynyddu.

Mae lle gennym nawr i symud i Lefel Rhybudd 1 ond byddwn yn gwneud hynny fesul cam, gan ganolbwyntio ar ddigwyddiadau a gweithgareddau awyr agored i ddechrau. Bydd gweithredu fesul cam fel hyn yn rhoi amser i ni gael rhagor o ddata am effaith yr amrywiolyn hwn, ac i fwy o bobl gael eu brechu.

Bydd y newidiadau i’r rheoliadau coronafeirws o 7 Mehefin felly yn cynnwys y canlynol:

• Gall hyd at 30 o bobl gyfarfod yn yr awyr agored, gan gynnwys mewn gerddi preifat, lletygarwch awyr agored a mannau cyhoeddus.

• Gall cynulliadau a digwyddiadau mwy wedi’u trefnu, fel cyngherddau, gemau pêl-droed a gweithgareddau chwaraeon, fel grwpiau rhedeg wedi’u trefnu gael eu cynnal yn yr awyr agored, gyda hyd at 4,000 o bobl yn sefyll a 10,000 o bobl yn eistedd. Rhaid i holl drefnwyr digwyddiadau a gweithgareddau gynnal asesiad risg llawn a gosod mesurau i atal lledaeniad y coronafeirws, gan gynnwys cadw pellter cymdeithasol.

• Gall hyd at dair aelwyd ffurfio aelwyd estynedig.
   

Byddwn yn ystyried newidiadau pellach i’r rheoliadau ar weithgareddau o dan do yn ddiweddarach yn y cylch tair wythnos, os bydd y sefyllfa o ran iechyd y cyhoedd yn caniatáu hynny. Byddant yn cynnwys:

• Y rheol chwech o bobl ar gyfer cwrdd o dan do mewn cartrefi preifat a llety gwyliau.

• Cynyddu’r niferoedd a ganiateir mewn cynulliadau wedi’u trefnu o dan do ac ailgychwyn digwyddiadau o dan do.

• Agor canolfannau sglefrio iâ.

Rydym wedi adolygu’r Rheoliadau Iechyd y Cyhoedd (Gwarchodaeth rhag Troi Allan) (Rhif 2) (Cymru) (Coronafeirws) 2021 ac wedi penderfynu y byddant yn parhau i fod yn eu lle am y tro hyd at 30 Mehefin fan bellaf. Rydym yn ystyried opsiynau pellach i gryfhau cymorth i denantiaid. Yn y cyfamser, hoffem annog pob tenant sy’n cael trafferth talu eu rhent i siarad â’i landlord a chysylltu â Cyngor ar Bopeth neu Shelter Cymru i gael rhagor o gymorth a chefnogaeth.