Leighton Andrews, y Gweinidog Addysg a Sgiliau
Cyhoeddwyd y cynnwys hwn dan weinyddiaeth Llywodraeth Cymru 2011 i 2016
Ar 6 Tachwedd 2012, gwnaethpwyd Datganiad Llafar gennyf i’r Cynulliad Cenedlaethol yn croesawu’r datblygiadau gan Brifysgol Cymru, Casnewydd a Phrifysgol Morgannwg o ran eu gweithgareddau cyn integreiddio. Gwnaeth Cadeiryddion y ddau sefydliad y sefyllfa’n glir y byddai’n well ganddynt uno o fis Ebrill eleni.
Rwy’n falch o gyhoeddi fy mod wedi llofnodi Gorchymyn Diddymu ar gyfer Corfforaeth Addysg Uwch Casnewydd. Cyflwynwyd y Gorchymyn i’r Cynulliad Cenedlaethol ar 20 Mawrth. Yn amodol ar gwblhau’r prosesau statudol arferol, daw y Gorchymyn i rym ar 11 Ebrill 2013. Bydd yn diddymu Corfforaeth Addysg Uwch Casnewydd, Prifysgol Cymru, ac yn trosglwyddo eiddo, hawliau a rhwymedigaethau y sefydliad hwnnw i Brifysgol Morgannwg. Wedi uno, gelwir y sefydliad newydd yn Brifysgol De Cymru.
Mae fy mhenderfyniad i lunio’r Gorchymyn yn dilyn cyfnod o ymgynghori gyda’r sefydliadau dan sylw, a gyda rhanddeiliaid eraill. Wedi ystyried achos busnes y sefydliad ar gyfer yr uno, yn ogystal â’r materion a godwyd gan randdeiliaid, a phob gwybodaeth berthnasol arall sydd ar gael, rwy’n credu bod y penderfyniad i ddiddymu Casnewydd ac uno â Morgannwg y penderfyniad iawn.
Er mwyn sicrhau bod y broses o drosglwyddo i’r sefydliad newydd yn un esmwyth, rydym yn sicrhau, drwy Gyngor Cyllido Addysg Uwch Cymru, gyllid ychwanegol o £24.8 miliwn dros y dair blynedd nesaf. Mae creu’r sefydliad newydd yn llwyddiant sylweddol ac yn gam mawr tuag at fodloni ein hymrwymiad i sefydlu nifer llai o brifysgolion cryfach yng Nghymru. Rwy’n dymuno pob llwyddiant i Brifysgol De Cymru.