Damweiniau ffyrdd wedi’u cofnodi gan yr heddlu: 2021

Cafodd pandemig y coronafeirws (COVID-19), â’i gyfyngiadau ar sut, ble a pham yr oedd pobl yn cael teithio yng Nghymru, effaith ar nifer y damweiniau a’r anafusion ffyrdd a gofnodwyd gan yr heddlu gydol y rhan fwyaf o 2020. Roedd yr effaith hon wedi parhau yn 2021.

Prif bwyntiau

Image

• Yn 2021 cofnododd heddluoedd yng Nghymru gyfanswm o 3,288 o ddamweiniau ffordd, cynnydd o 416 (14.5%) o'i gymharu â 2020, sef y flwyddyn isaf ar gofnod.
• Arweiniodd y damweiniau ffordd hyn yn 2021 at 4,348 o anafiadau personol. O'r rhain, lladdwyd 86 o bobl, anafwyd 925 o bobl yn ddifrifol a chofnodwyd 3,337 o anafiadau 'mân'.
• Yn ystod 2021, digwyddodd dros hanner yr holl ddamweiniau ffordd (53%) ar ffyrdd 30mya gyda'r gyfran uchaf nesaf (25%) yn digwydd ar ffyrdd 60mya. Rhannau ffordd â therfyn cyflymder o 20mya oedd â'r gyfran isaf, gan gyfrif am 3% o'r holl ddamweiniau.
• O edrych ar y duedd hirdymor, bu gostyngiad cyffredinol yn nifer y damweiniau ffordd lle cafwyd anafiadau personol a gofnodwyd gan heddluoedd yng Nghymru.
• Yn ystod y blynyddoedd diwethaf, mae nifer y damweiniau sy'n arwain at farwolaethau neu anaf difrifol wedi bod yn gymharol sefydlog, gyda'r gostyngiad cyffredinol mewn damweiniau yn cael ei gyfrif gan ostyngiad parhaus mewn damweiniau anafiadau 'mân'.