Y Cynllun Gweithredu Seiber i Gymru

Mae’n Cynllun Gweithredu Seiber yn amlinellu’n gweledigaeth ar gyfer Cymru a fydd yn ffynnu drwy fod yn seibergadarn a thrwy feithrin talent ac arloesedd yn y maes. Mae hynny’n golygu bod pobl, busnesau a’r gwasanaethau cyhoeddus mor ddiogel â phosibl rhag seiberymosodiadau a’u bod mor barod â phosibl ar eu cyfer. Mae hefyd yn golygu bod gennym y sgiliau a'r gweithlu cywir i wireddu’n gweledigaeth a bod gennym seibereconomi ffyniannus.

Er mwyn helpu i wireddu’n gweledigaeth, rydym yn annog sefydliadau i gydweithio, gan gynnwys:

• byd diwydiant
• y byd academaidd
• llywodraeth
• y gwasanaethau cyhoeddus ehangach
• cyrff hyd braich
• cyrff gorfodi'r gyfraith

Mae pedwar maes yn cael blaenoriaeth yn y Cynllun Gweithredu Seiber:

• Tyfu’n ecosystem seiber
• Creu llif o dalent yn y maes seiber
• Cryfhau’n seibergadernid
• Diogelu’n gwasanaethau cyhoeddus

Buom yn gweithio gydag amrywiaeth o randdeiliaid i ddatblygu'r Cynllun hwn, sy'n ategu’r Strategaeth Ddigidol i Gymru. Mae’r Strategaeth Ddigidol i Gymru yn amlinellu sut y byddwn yn defnyddio gwasanaethau digidol, data a thechnoleg i wella bywydau pobl yng Nghymru. Er mwyn cyrraedd nodau'r Strategaeth Ddigidol i Gymru mae'n hanfodol bod gennym:

• amddiffynfeydd seiber effeithiol
• sector seiberfusnes cryf
• pobl, busnesau a gweision cyhoeddus sy'n seiber-effro