Cyfarfod y Cabinet: 25 Tachwedd 2021

• Y Gwir Anrh. Mark Drakeford AS (Cadeirydd)
• Rebecca Evans AS
• Lesley Griffiths AS
• Jane Hutt AS
• Julie James AS
• Jeremy Miles AS
• Eluned Morgan AS

• Hannah Blythyn AS
• Dawn Bowden AS
• Julie Morgan AS
• Lynne Neagle AS
• Lee Waters AS

Ymddiheuriadau

• Vaughan Gething AS
• Mick Antoniw AS

Swyddogion

• Andrew Goodall, Yr Ysgrifennydd Parhaol
• Des Clifford, Cyfarwyddwr Cyffredinol Swyddfa’r Prif Weinidog
• Will Whiteley, Dirprwy Gyfarwyddwr, Is-adran y Cabinet
• Toby Mason, Cyfathrebu Strategol
• Jane Runeckles, Cynghorydd Arbennig
• Madeleine Brindley, Cynghorydd Arbennig
• Alex Bevan, Cynghorydd Arbennig
• Daniel Butler, Cynghorydd Arbennig
• Ian Butler, Cynghorydd Arbennig
• Kate Edmunds, Cynghorydd Arbennig
• Sara Faye, Cynghorydd Arbennig
• Owen John, Cynghorydd Arbennig
• Clare Jenkins, Cynghorydd Arbennig
• Andrew Johnson, Cynghorydd Arbennig
• Tom Woodward, Cynghorydd Arbennig
• Christopher W Morgan, Pennaeth Ysgrifenyddiaeth y Cabinet (cofnodion)
• Damian Roche, Ysgrifenyddiaeth y Cabinet
• Tracey Burke, Cyfarwyddwr Cyffredinol, Addysg a Gwasanaethau Cyhoeddus
• Reg Kilpatrick, Cyfarwyddwr Cyffredinol, Cydgysylltu’r Argyfwng COVID-19
• Judith Paget, Cyfarwyddwr Cyffredinol, Iechyd
• Andrew Slade, Cyfarwyddwr Cyffredinol, yr Economi, Sgiliau a Chyfoeth Naturiol
• Frank Atherton, Prif Swyddog Meddygol
• Chris Jones, Dirprwy Brif Swyddog Meddygol
• Rob Orford, Prif Swyddog Gwyddonol – Iechyd
• Fliss Bennee, Cyd-gadeirydd y Gell Cyngor Technegol
• Liz Lalley, Cyfarwyddwr Adfer
• Tom Smithson, Dirprwy Gyfarwyddwr Ailddechrau ar ôl COVID-19
• Helen Lentle, Cyfarwyddwr Gwasanaethau Cyfreithiol
• Dylan Hughes, Prif Gwnsler Deddfwriaethol
• Jason Thomas, Cyfarwyddwr Diwylliant, Chwaraeon a Thwristiaeth

1.1 Cyflwynodd y Prif Weinidog y papur, a oedd yn amlinellu cynigion ac argymhellion ar gyfer y posibilrwydd o ymestyn y Pàs COVID i gynnwys lleoliadau lletygarwch. Roedd y Cabinet wedi cytuno i ddychwelyd at hyn wedi’r adolygiad o’r Rheoliadau Cyfyngiadau Coronafeirws (Rhif 5) ar 15 Tachwedd.

1.2 Atgoffwyd y Gweinidogion mai diben y cyfyngiadau a oedd yn ymwneud â COVID-19 yng Nghynllun Rheoli’r Coronafeirws oedd rheoli’r feirws a’i atal rhag lledaenu, gan ddiogelu pobl a darparu ymateb iechyd cyhoeddus i achosion, lledaeniad yr haint, neu halogiad gan y feirws. Rhaid bod bygythiad i iechyd y cyhoedd, ac roedd yn rhaid i’r cyfyngiadau fod yn gymesur â’r hyn yr oeddent yn bwriadu ei gyflawni.

1.3 Gwahoddodd y Prif Weinidog y Prif Swyddog Meddygol i roi trosolwg o’r sefyllfa iechyd cyhoeddus bresennol.

1.4 Adroddwyd bod lefel uchel o drosglwyddiad yn y gymuned yng Nghymru. Roedd cyfraddau heintio ar drywydd a oedd wedi cyrraedd gwastad tonnog, a oedd yn gwella’n raddol. Roedd y gyfradd heintio gyfartalog, ar gyfer saith diwrnod, newydd ddisgyn o dan 500 ym mhob 100,000 o’r boblogaeth. Roedd nifer yr achosion ar gynnydd yn yr ystod oedran 0-16, ond yn gostwng ymysg y rheini dros 60 oed, ac roedd hyn yn cael ei adlewyrchu yn y cyfraddau derbyn i’r ysbyty.

1.5 Ar hyn o bryd, roedd 641 o gleifion COVID-19 mewn gwelyau ysbyty, sef 14% yn llai na’r wythnos flaenorol. Roedd 394 o achosion, a oedd wedi cael eu cadarnhau, sef gostyngiad o 16% yn ystod yr wythnos flaenorol.

1.6 Gyda nifer uchel o bobl yn manteisio ar y cyfle i gael eu brechu; y rhaglen sy’n darparu’r dos atgyfnerthu’n mynd o nerth i nerth; cyfraddau heintio’n gostwng ym mysg pobl hŷn; a sefydlogrwydd mewn cartrefi gofal, roedd y Prif Swyddog Meddygol yn ofalus optimistaidd na fyddai’r cynnydd cyflym mewn achosion a oedd yn digwydd ar draws cyfandir Ewrop yn lledaenu i’r DU.

1.7 Roedd aelodau’r Gell Cynghori Technegol o’r un farn, er eu bod yn pwysleisio’r angen i barhau’n wyliadwrus a monitro senarios heintio ymhellach i ffwrdd, megis yn Ne Affrica.

1.8 O ran datblygiadau eraill, er gwaethaf arwyddion cynharach i’r gwrthwyneb, nodwyd bod Llywodraeth yr Alban wedi penderfynu peidio ag ymestyn y defnydd o’i phasbort brechu.

1.9 Cytunodd y Gweinidogion, o dan y senarios a ystyriwyd yn flaenorol gan y Cabinet, ei bod yn ymddangos bod y cyd-destun iechyd yn cefnogi senario COVID sefydlog, gan ddod i’r casgliad na ddylid ymestyn y defnydd o’r Pàs COVID ar hyn o bryd.

1.10 Dylai’r naratif yn y cyhoeddiad ei gwneud yn glir nad oedd hyn yn golygu llacio’r rheolau, a bod COVID-19 yn parhau’n fygythiad real iawn, ac y dylai pobl fod yn hynod wyliadwrus a pharhau i ddilyn mesurau er mwyn osgoi’r angen i symud at lefel COVID Brys.

1.11 Cytunodd y Cabinet y dylai swyddogion gweithredu’n unol â’r penderfyniadau a wnaed gan Weinidogion, gan roi’r cyfarwyddiadau priodol i gyfreithwyr.