Cyfarfod Panel Annibynnol Cymru ar Gydnabyddiaeth Ariannol: 14 Mai 2024

Frances Duffy, Cadeirydd
Saz Willey, Is-gadeirydd
Bev Smith, Aelod 
Kate Watkins, Aelod 
Derbyniwyd ymddiheuriadau gan Dianne Bevan, Aelod
Sara Rees, Ysgrifenyddiaeth
Shan Whitby, Ysgrifenyddiaeth 

Rhanddeiliaid allanol oedd yn bresennol yn y cyfarfod

Roger Ashton-Winter, Comisiwn Ffiniau a Democratiaeth Leol Cymru  
Y Cynghorydd Rob Stewart, Arweinydd y Cyngor, Cyngor Abertawe
Chris Stevens, Swyddog Polisi yn Llywodraeth Cymru

Cyfarfu Panel Annibynnol Cymru ar Gydnabyddiaeth Ariannol (‘y Panel’) ddydd Mawrth 14 Mai 2024. 

Nod y cyfarfod oedd:

• trafod pontio o’r Panel i Gomisiwn Democratiaeth a Ffiniau Cymru ym mis Mawrth 2025
• adolygu nodiadau cyfarfod mis Ebrill 2024 (y nodiadau llawn a’r crynodeb), a chytuno arnynt, gan nodi’r camau gweithredu, y gyllideb a Diweddariad yr Ysgrifenyddiaeth
• trafod taliadau cydnabyddiaeth ar gyfer y Cyd-bwyllgorau Corfforaethol, gan gytuno ar y camau nesaf 
• trafod Unrhyw fater arall

Y diweddaraf am y trefniadau pontio 

Adroddodd y Cadeirydd fod Cyfnod 1 y Bil Etholiadau a Chyrff Etholedig (Cymru) wedi'i gwblhau, gan nodi y bydd y Bil yn symud ymlaen i Gyfnod 2 a bod y gwrandawiad pwyllgor nesaf i’w gynnal ddydd Iau 16 Mai. Dilynir hyn gan ddadleuon Cyfnod 3 a Chyfnod 4 ar 18 a 24 Mehefin.

Bydd y Cadeirydd yn gweithio gyda Roger Ashton-Winter (RAW) a Bev Smith (BS) i ddatblygu Cynllun Pontio, gan nodi’r camau gweithredu ac amlygu’r materion er mwyn sicrhau bod gwaith yn cael ei gynllunio a'i gwblhau cyn i’r cyfnod pontio ddod i ben ym mis Ebrill 2025. Gwneir hyn er mwyn sicrhau bod y trefniadau pontio ar gyfer trosglwyddo swyddogaethau’r Panel Annibynnol ar Gydnabyddiaeth Ariannol i Gomisiwn Democratiaeth a Ffiniau Cymru ym mis Ebrill 2025 yn mynd rhagddynt yn ddi-rwystr.

Cyllideb

Trafododd y Panel y gyllideb ar gyfer 2024 i 2025 a nodwyd y gyllideb a osodwyd ar gyfer cyfathrebu/ymgysylltu ac ar gyfer ymchwil.

Camau gweithredu a diweddariad yr ysgrifenyddiaeth

Cytunodd y Panel ar y cofnodion llawn a’r crynodeb ar gyfer ei gyfarfod ym mis Ebrill 2024.

Adolygodd y Panel yr ohebiaeth oddi wrth ddau Brif Gyngor a’i thrafod.

Cydnabyddiaeth ariannol ar gyfer Cyd-bwyllgorau Corfforaethol

Nid yw’r Panel wedi ystyried yn fanwl cyn hyn y cwestiwn o gydnabyddiaeth ariannol ar gyfer aelodau’r Cyd-bwyllgorau Corfforaethol (‘y Cyd-bwyllgorau’) sydd newydd eu sefydlu, ar ôl gwneud y penderfyniad yn ei Adroddiad Blynyddol ar gyfer 2022 i aros i’r cyrff newydd hyn gael eu datblygu cyn trafod hyn.

Ystyriodd y Panel bapur penderfyniad, a luniwyd ar y cyd gan yr Ysgrifenyddiaeth a’r arweinydd polisi yn Llywodraeth Cymru ar gyfer y Cyd-bwyllgorau. Roedd y papur yn darparu gwybodaeth er mwyn i’r Panel ystyried a ddylai aelodau’r Cyd-bwyllgorau gael tâl cydnabyddiaeth drwy nodi Pwerau a Dyletswyddau, Aelodaeth a Strwythur, Llywodraethiant, Safonau a Chraffu.

Croesawodd y Panel hefyd y Cynghorydd Rob Stewart, Cadeirydd Cyd-bwyllgor Corfforaethol De-orllewin Cymru i roi trosolwg ar y cynnydd hyd yma o ran datblygu’r Cyd-bwyllgorau, eu rolau a’u cyfrifoldebau ac i gyfrannu at y drafodaeth ar daliadau cydnabyddiaeth ar gyfer yr aelodau. 

Cytunodd y Panel, fel blaenoriaeth, y dylid cyhoeddi Adroddiad Atodol, i fod yn destun ymgynghoriad, er mwyn cynllunio Penderfyniad Drafft ar daliadau cydnabyddiaeth ar gyfer aelodau lleyg cyfetholedig y Cyd-bwyllgorau. Byddai hyn yn dilyn yn fras yr egwyddorion y cytunwyd arnynt eisoes ar gyfer aelodau cyfetholedig y Prif Gynghorau, Awdurdodau’r Parciau Cenedlaethol a’r Awdurdodau Tân ac Achub. Nododd y Panel eu bod wedi cytuno yn flaenorol y dylid talu hawliadau costau teithio a chynhaliaeth a chostau lwfansau gofal i holl aelodau’r Cyd-bwyllgorau. 

Gwrthododd y Panel wahoddiad i fod yn bresennol yng Nghynhadledd CLlLC 2024, oherwydd ymrwymiadau eraill a oedd yn y dyddiadur eisoes.

Trafododd y Panel y trefniadau ar gyfer ymgysylltu â rhanddeiliaid (i baratoi ar gyfer cyhoeddi adroddiad drafft).

Cynhelir cyfarfod nesaf Panel Annibynnol Cymru ar Gydnabyddiaeth Ariannol ar 25 Mehefin 2024. 

Os bydd gennych unrhyw faterion yr hoffech eu codi gyda’r Panel, a fyddech cystal â chysylltu â’r Ysgrifenyddiaeth drwy anfon e-bost i IRPMailbox@llyw.cymru.