Mae’r Prif Weinidog, Carwyn Jones, yn gwahodd pobl yn Llanelli i sesiwn holi ac ateb ddydd Iau, 19 Ebrill 2018.
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Hoffai'r Prif Weinidog glywed eich syniadau ac ateb eich cwestiynau ar y materion sydd bwysicaf ichi.
Cynhelir y sesiwn yng Nghanolfan Selwyn Samuel, Park Crescent, Llanelli, SA15 3AE rhwng 6pm a 7:30pm.
Gallwch gofrestru eich diddordeb mewn mynychu Cyfarfod Carwyn Llanelli trwy Eventbrite. Gellir cyflwyno cwestiynau wrth gyrraedd y lleoliad, eu hesbostio ymlaen llaw at cabinetcommunications@llyw.cymru neu drwy Twitter gan ddefnyddio @fmwales a hashnod #cyfarfodcarwyn.
Dywedodd y Prif Weinidog, Carwyn Jones:
"Mae bron tair blynedd wedi mynd heibio ers imi gynnal sesiwn gyntaf Cyfarfod Carwyn. Ers hynny, dw i wedi teithio ar hyd a lled Cymru i glywed barn cymunedau lleol ac i ateb cwestiynau pobl.
“Mae’n bleser gen i gyhoeddi y bydd y digwyddiad nesaf yn cael ei gynnal yn Llanelli. Fe hoffwn i weld cynifer o bobl â phosibl yng Nghanolfan Selwyn Samuel felly os oes gennych chi gwestiwn i mi, os ydych eisiau codi ymwybyddiaeth am broblem sy’n effeithio ar eich cymuned, neu os oes gennych syniad a fyddai’n gwneud eich ardal leol yn lle gwell i fyw, dewch draw!
“Dyma'ch cyfle i ofyn y cwestiynau dych chi wir eisiau imi eu hateb. Rwy’n edrych ymlaen at gwrdd â phob un ohonoch ac i glywed beth sydd gennych chi i'w ddweud.”