Cyfarfod Bwrdd Gweithredu Strategaeth Gwaith Ieuenctid: 23 Ionawr 2025

• Sharon Lovell (SL) (Cadeirydd)
• Marco Gil-Cervantes (MG)
• Shahinoor Alom (SA)
• Deb Austin (DA)
• David Williams (DW)
• Sian Elen Tomos (ST)
• Lowri Jones (LJ)
• Dareth Edwards, Uwch Reolwr Strategaeth Gwaith Ieuenctid, Llywodraeth Cymru (DaE)
• Kirsty Harrington, Rheolwr Polisi Gwaith Ieuenctid, Llywodraeth Cymru (KH)
• Tom Kitschker, Swyddog Cymorth Tîm Ymgysylltu ag Ieuenctid, Llywodraeth Cymru (TK)
• Victoria Allen, Rheolwr Polisi Gwaith Ieuenctid, Llywodraeth Cymru (VA)
• Jo Trott, Dirprwy Gyfarwyddwr Llwybrau Dysgu, Llywodraeth Cymru (JT)

Ymddiheuriadau

• Simon Stewart (SS)
• Dyfan Evans (DE)
• Joanne Sims (JS)

Gwrthdaro Buddiannau

Dim wedi ei ddatgan.

Cofnodion a chamau gweithredu y cyfarfod blaenorol

Adolygodd y Bwrdd y cofnodion a'r camau gweithredu o'r cyfarfod diwethaf a gynhaliwyd ar 27 Tachwedd 2024.

Cam Gweithredu: Cytunodd swyddogion i ddosbarthu adroddiad y cwrs preswyl i bobl ifanc a gynhaliwyd ym mis Awst 2024.

Gohiriwyd y Gwobrau yn 2024 er mwyn caniatáu amser i adolygu effeithiolrwydd y model presennol ac i ba raddau y mae'n cyflawni amcanion cyfathrebu y cytunwyd arnynt gan Lywodraeth Cymru. Cyflwynodd DA a KH dystiolaeth gan y sector a rhanddeiliaid ehangach a gasglwyd ym mis Rhagfyr 2024 i ddeall llwyddiant y model presennol a chael sylwadau ar sut y gellid ei wella, a oedd yn cynnwys y pwyntiau canlynol. 

• Galw am arweiniad a hyfforddiant i ymgeiswyr er mwyn gwella ansawdd yr enwebiadau
• Ystyried proses dau gam sy'n gofyn i ymgeiswyr gael adborth cychwynnol ar eu syniad sylfaenol cyn neilltuo amser i greu cais llawn
• Angen cymryd camau i geisio sicrhau mwy o amrywiaeth yn yr enwebiadau – edrych ar ardaloedd daearyddol lle na cheir llawer o enwebiadau ar hyn o bryd a chefnogi enwebiadau gan ystod ehangach o sefydliadau
• Angen mynd i'r afael â'r adnoddau sylweddol (amser ac ariannol) sy'n ofynnol er mwyn cyflawni'r gwobrau.
• Galw am rôl fwy sylfaenol i bobl ifanc wrth gyflawni'r gwobrau.

Yn seiliedig ar yr adborth hwn ac ystyriaethau ehangach o effaith a chost, mae DA/KH wedi datblygu nifer o wahanol opsiynau i'w hystyried gan y Bwrdd. 

Nododd aelodau'r Bwrdd fod y sector yn gwerthfawrogi'r Gwobrau yn fawr iawn a'u bod yn ffordd amhrisiadwy o ddathlu rhagoriaeth a rhannu arfer gorau. 

Cafodd y cynnig i greu cyfleoedd i bobl ifanc mewn model yn y dyfodol dderbyniad da gydag awgrym y gellid gwella hyn ymhellach drwy gyfleoedd am hyfforddiant achrededig. 

Bydd sylwadau'r Bwrdd yn helpu i lunio ffordd ymlaen ochr yn ochr ag ystyriaethau ehangach o werth am arian, cynaliadwyedd ac effaith. 

Cam Gweithredu: Gwahoddwyd aelodau'r Bwrdd i ystyried a rhoi adborth ar yr opsiynau a gyflwynwyd.

Daeth yr ymgynghoriad ar gynigion i gryfhau'r sail ddeddfwriaethol ar gyfer gwaith ieuenctid i ben ar 10 Ionawr. Rhoddodd swyddogion yr wybodaeth ddiweddaraf am yr ystod o ymatebion a ddaeth i law. 

Er bod dadansoddiad manwl yn dal i fynd rhagddo, rhannodd swyddogion y prif negeseuon a themâu a ddaeth i'r amlwg o ddadansoddiad cychwynnol. 

Roedd aelodau'r Bwrdd yn fodlon gyda'r nifer o ymatebion a gafwyd a'r ymgysylltiad parhaus gan bob rhan o'r sector. Roedd yr aelodau hefyd yn falch o gael ymatebion o'r tu hwnt i'r sector, gan dynnu sylw at y gwerth a roddir ar waith ieuenctid gan ymarferwyr ehangach. 

Nododd swyddogion y blaenoriaethau allweddol ar gyfer y gwaith hwn dros y misoedd nesaf. Y nod yw cwblhau'r dadansoddiad erbyn diwedd mis Ionawr. Bydd y Tasglu Deddfwriaeth a sefydlwyd i lywio'r gwaith o ddatblygu'r cynigion hyn yn cael ei ailgynnull i ystyried yr ymatebion a rhoi cyngor ar unrhyw faterion sy'n codi. Bydd swyddogion hefyd yn trefnu trafodaethau dilynol gyda rhanddeiliaid allweddol lle bo angen.

Trosolwg o'r gyllideb

Rhoddodd swyddogion yr wybodaeth ddiweddaraf am y Grant Cymorth Ieuenctid ar gyfer 2025 i 2028 gan nodi, er bod cyfanswm y dyraniad grant wedi'i ddiogelu, y bydd dyraniadau ar lefel awdurdod lleol yn amrywio gan eu bod yn cael eu cyfrifo ar sail data.

Mae canlyniadau diweddar y Grant Strategol ar gyfer Sefydliadau Gwaith Ieuenctid Gwirfoddol hefyd bellach wedi'u rhannu gyda'r holl ymgeiswyr. Roedd y rownd ariannu yn gystadleuol iawn gyda dros 45 o geisiadau, ac roedd 17 ohonynt yn llwyddiannus. Bydd yr arian yn cael ei ddyrannu i'r ymgeiswyr llwyddiannus dros gylch ariannu tair blynedd o 2025 i 2028.

Yr wybodaeth ddiweddaraf am gorff cenedlaethol posib

Cyfarfu Ysgrifennydd y Cabinet dros Addysg â'r Grŵp Prif Swyddogion Ieuenctid ym mis Rhagfyr 2024 i glywed eu barn ar y posibilrwydd o sefydlu corff cenedlaethol ar gyfer gwaith ieuenctid yng Nghymru. Cynhelir cyfarfod tebyg gyda chynrychiolwyr o'r sector gwirfoddol ym mis Mawrth. Mae Ysgrifennydd y Cabinet wedi dweud yn glir y byddai angen dangos bod sefydlu corff cenedlaethol yn gwella'n sylweddol y ddarpariaeth o wasanaethau rheng flaen i bobl ifanc.

Cynhadledd gwaith ieuenctid

Bydd y gynhadledd gwaith ieuenctid yn cael ei chynnal ar 20 Chwefror yn Stadiwm Dinas Caerdydd. Mae'r galw wedi bod yn uchel gyda dros 370 o gyfranogwyr wedi'u cofrestru. Thema'r gynhadledd eleni yw cydweithio a phartneriaeth. 

Dyddiad a ffocws arfaethedig cyfarfod nesaf y Bwrdd (20 Mawrth 2025)

• Yr wybodaeth ddiweddaraf am sefydlu corff cenedlaethol ar gyfer gwaith ieuenctid
• Yr wybodaeth ddiweddaraf ar dasgau blaenoriaeth y Grwpiau Cyfranogiad ar Weithredu
• Adborth ac adolygiad o'r gynhadledd gwaith ieuenctid