Yn syth yn ôl pedalau Tom Pidcock a’i fedal aur yng Ngemau Olympaidd Paris, mae seren arall ym myd beicio mynydd Prydain yn newid gêr wrth ddatblygu busnes beicio rhyngwladol yn y Canolbarth.
Cafodd Atherton Bikes, sy’n eiddo i Dan, Gee a Rachel Atherton, dau frawd ac un chwaer, ei sefydlu yn 2019 ac mae eisoes wedi rhoi Cymru ar fap y byd cynhyrchu beiciau mynydd. Er mai dim ond pump oed yw’r cwmni, mae Atherton Bikes eisoes wedi helpu Charlie Hatton i ennill teitl Pencampwr Lawr Rhiw UCI y Byd yn 2023 ac Andreas Kolb i fod yn Bencampwr Ewrop yn 2024. Gwnaeth y ddau gael eu buddugoliaethau ar feiciau Atherton Bikes.
Mae gan y cwmni gynlluniau nawr i ehangu eto ac mae wedi cael pecyn o gymorth gan Lywodraeth Cymru sy’n cynnwys cyngor ar allforio gan Busnes Cymru a chymorth ariannol o Gronfa Dyfodol yr Economi. Bydd hynny’n helpu’r tri i gyrraedd copaon eu maes ac ehangu eu cwmni cynhyrchu beiciau mynydd - sy' eisoes yn allforio 66% o'u beiciau.
Cyn sefydlu'r busnes roedd y tri eisoes wedi gadael eu marc ar y byd beicio mynydd, ar ôl ennill bron i 50 o gwpanau beicio mynydd y byd rhyngddynt. Does yr un teulu yn y byd wedi ennill cymaint o gwpanau yn hanes y beic!!
Mae'r cwmni'n defnyddio technoleg a ddefnyddir yn Fformiwla Un a'r diwydiant awyrofod a phrosesau a thechnolegau blaengar i gynhyrchu ei feiciau, gan allforio beiciau ledled y byd gan gynnwys i’r Almaen, y Swistir, Japan, Singapore, Awstralia, Seland Newydd a Chanada.
Mae Atherton Bikes nawr am symud i bencadlys newydd yn Nhreowain, Machynlleth, gyda chymorth arian o Gronfa Dyfodol yr Economi. Yn y fan honno, bydd yn gallu cynhyrchu mwy o’i feiciau carbon drutach a mwy hefyd o’i feiciau alwminiwm mwy fforddiadwy. Bydd y prosiect yn creu hefyd un ar ddeg o swyddi newydd, gan ddarparu cyfleoedd gwaith o safon yn y Canolbarth a datblygu'r sgiliau’r gymuned leol.
Mae'r cwmni hefyd yn cefnogi economi ehangach Cymru, gan symud rhannau pwysig o'r gadwyn gyflenwi i wneuthurwyr yng Nghymru. Mae'r teulu yn berchen hefyd ar Barc Beicio Dyfi sy'n denu cannoedd o ymwelwyr bob wythnos i ardal Machynlleth. Mae’r Parc yn cael ei ddefnyddio hefyd fel maes profi ar gyfer cynnyrch newydd.
Dywedodd Dan Brown, Pennaeth Atherton Bikes:
"Dim gorddweud yw ei bod wedi cymryd oes i greu’r cwmni hwn. Adeiladais fy meic cyntaf ym 1992 pan oeddwn yn 10 oed. A ninnau’n hen gyfarwydd â gweithio fel tîm erbyn hyn, mae pob un ohonon ni wedi breuddwydio am weithio yr un mor galed i ddatblygu’n beiciau ag y gwnaethon ni wrth wthio’r ffiniau ar draciau beicio’r byd am 20 mlynedd. Mae Atherton Bikes yn gweld y freuddwyd honno'n dod yn wir, a chyda chymorth Llywodraeth Cymru rydym hefyd yn talu’n dyled i’r gymuned sydd wedi ein cefnogi ni bob cam o’r ffordd."
Dywedodd Ken Skates, Gweinidog yr Economi, Trafnidiaeth a Gogledd Cymru:
"Mae Atherton Bikes yn sicr yn stori o lwyddiant i Gymru, gyda Dan, Gee a Rachel yn gwthio'r ffiniau ar ac oddi ar y trac beicio. Mae'r cwmni'n cystadlu ar lefel fyd-eang, a bydd y cymorth hwn yn ei helpu i estyn ei derfynau hyd yn oed ymhellach. Bydd yn cael effaith gadarnhaol ar y cwmni ac ar y gadwyn gyflenwi ehangach, yn ogystal â chreu cyfleoedd gwaith newydd mewn ardal wledig.
"Un peth sy’n amlwg yw angerdd tîm Atherton Bikes dros gynhyrchu beiciau mynydd a hefyd dros sicrhau bod y Canolbarth yn rhan bwysig o’u cynlluniau ar gyfer parhau i arloesi yn y dyfodol."