Crynodeb perfformiad a gweithgaredd y GIG: Gorffennaf a Awst 2019

Gofal heb ei drefnu

Roedd cyfartaledd y derbyniadau dyddiol i adrannau Damweiniau ac Achosion Brys yn is ym mis Awst, yn dilyn y ffigurau uchaf erioed ym mis Gorffennaf. Gostyngodd canran y cleifion sy'n treulio llai na 4 awr yno ychydig, a gostyngodd nifer y cleifion a dreuliodd fwy na 12 awr yno.

Gostyngodd nifer cyfartalog y galwadau dyddiol i’r gwasanaeth ambiwlans ym mis Awst. Fe wnaeth canran y galwadau coch a oedd yn cael ymateb brys cyn pen 8 munud gwrdd â’r targed, ond roedd o dan 70% am yr ail fis o’r bron.

Cynyddodd yr amser cyfartalog ar gyfer ymateb ambiwlansys i alwadau brys ychydig a chynyddodd nifer yr achosion o oedi wrth drosglwyddo gofal ym mis Awst.

Gofal wedi’i drefnu

Roedd nifer y cleifion a oedd yn aros yn hirach na’r amser targed am brofion diagnostig a phrofion therapi yn uwch ym mis Gorffennaf. Roedd amseroedd aros cyfartalog wedi gostwng ychydig ar gyfer profion diagnostig a phrofion therapi.

Roedd perfformiad rhwng atgyfeirio a thriniaeth yn gymysg; roedd yr un ganran o gleifion yn aros llai na’r 26 wythnos ond roedd mwy o gleifion yn aros mwy na  36 wythnos hefyd. Roedd yr amser aros am driniaeth rhywfaint yn is ar gyfartaledd hefyd.

Roedd canran y cleifion a oedd yn dechrau ar driniaeth am ganser o fewn yr amser targed wedi cynyddu ar gyfer cleifion ar y llwybr brys ac ar gyfer cleifion nad oeddent ar y llwybr brys. Mae ystadegau arbrofol ar gyfer un llwybr canser wedi’u cynnwys yn y datganiad hwn hefyd.