Cludiant môr: 2017

Prif bwyntiau

Gostyngodd cyfanswm y traffig nwyddau ym mhorthladdoedd Cymru o 3.6% yn 2017 i  51.6 miliwn tunnell (Mt), ei bwynt isaf ers cychwyn cofnodion tebyg yn 1976. O draffig prif borthladdoedd Cymru, roedd 87.0% yn draffig tramor gyda 63.6% o hwnnw’n fewnforion. Roedd y rhan fwyaf o fewnforion ac allforion tramor yn draffig swmpus (er enghraifft olew crai, cynhyrchion olew, nwy hylifol a mwynau.

Porthladdoedd Cymru yw porth Gweriniaeth Iwerddon i weddill Ewrop. Aeth 0.3 Mt o’r nwyddau a gludwyd ar gerbydau nwyddau trwm oedd wedi eu cofrestru yng Ngweriniaeth Iwerddon rhwng Gweriniaeth Iwerddon ac Ewrop trwy borthladdoedd Cymru. Aeth 73.6% o’r traffig hwn trwy borthladdoedd y Gogledd.

Dros y tymor hir, mae nifer y bobl sy’n teithio ar y môr rhwng Gweriniaeth Iwerddon a Chymru wedi gostwng. Ers dileu’r gwasanaeth rhwng Caergybi a Dun Laoghaire yn 2015, mae nifer y teithwyr ar fferi Caergybi i Ddulyn wedi cynyddu. Defnyddiodd 74.9% o’r teithwyr a deithiodd rhwng Gweriniaeth Iwerddon a Chymru yn 2017 y gwasanaeth rhwng Caergybi a Dulyn.