Cylch gorchwyl

Nod ac amcanion Bwrdd Cynghori Cynllun Pensiwn Diffoddwyr Tân Cymru yw:

• cynghori Gweinidogion Cymru, ar ba mor fuddiol yw newidiadau i gynllun
• pensiwn diffoddwyr tân 2015 ac unrhyw Gynllun cysylltiedig (y cynlluniau cysylltiedig yw cynlluniau pensiwn diffoddwyr tân 1992 a 2007)
• cynghori Gweinidogion Cymru a Rheolwr y Cynllun ar unrhyw fater arall yr ystyria’n berthnasol i weithrediad effeithiol ac effeithlon y cynlluniau hyn
• cynghori’r byrddau pensiwn lleol ar weinyddu a rheoli’r cynllun yn effeithiol ac effeithlon, ynghyd ag unrhyw gynllun cysylltiedig ac unrhyw gronfa bensiwn
• cynghori Gweinidogion Cymru ar elfennau o’r broses brisio, gan gynnwys y rhagdybiaethau prisio a argymhellir gan Adran Actiwari'r Llywodraeth ac a nodir gan Weinidogion Cymru
• gwneud argymhellion ar addasiadau i’r cynlluniau pe digwydd i’r costau fynd y tu hwnt i uchafswm costau’r cyflogwr

Bydd Gweinidogion Cymru yn defnyddio aelodau’r Bwrdd fel y cysylltiadau allweddol y byddant yn ymgynghori â nhw cyn cyflwyno’r newidiadau i’r cynllun. Gellir cyflawni’r ymgynghoriad hwn drwy bapurau trafod mewn cyfarfodydd penodol cyn neu ar ôl prosesau ymgynghori ffurfiol.

Bydd yr holl newidiadau i reoliadau pensiynau diffoddwyr tân hefyd yn destun ymgynghoriad cyhoeddus llawn. Bydd Llywodraeth Cymru yn dod ag unrhyw ymgynghoriad cyhoeddus o’r fath i sylw’r sefydliadau a gynrychiolir ar y Bwrdd fel y rhanddeiliaid allweddol ar bensiynau diffoddwyr tân yng Nghymru. Felly, bydd yn cynnig y cyfle i ymateb ar y cyd drwy’r Bwrdd ei hun, neu’n unigol, ar ran eu sefydliadau cynrychioliadol.

Bydd aelodau Bwrdd Cynghori Cynllun Pensiwn Diffoddwyr Tân Cymru yn cynnwys Cadeirydd annibynnol; ac o leiaf 2 ond nid mwy na 12 o bobl i gael eu henwebu gan eu sefydliadau cynrychioliadol a’u penodi gan Weinidogion Cymru, fel a ganlyn.

Aelodau:

• Cadeirydd Annibynnol
• Cynrychiolwyr Cyflogwyr unigolion a benodir gan Weinidogion Cymru
• Awdurdod Tân ac Achub Gogledd Cymru
• Awdurdod Tân ac Achub Canolbarth a Gorllewin Cymru
• Awdurdod Tân ac Achub De Cymru

Cynrychiolwyr Cyflogeion unigolion a benodir gan Weinidogion Cymru

• Undeb y Brigadau Tân x 2
• Cymdeithas yr Arweinwyr Tân
• Cymdeithas y Swyddogion Tân
• Cymdeithas Gwasanaethau Tân ac Achub

Mynychwyr eraill

Yn unol â chytundeb aelodau’r bwrdd, gall Cadeirydd Bwrdd Cynghori Cynllun Pensiwn Diffoddwyr Tân Cymru benodi ymgynghorwyr nad ydynt yn aelodau o Fwrdd Cynghori Cynllun Pensiwn Diffoddwyr Tân Cymru i fynychu cyfarfodydd o’r Bwrdd ac unrhyw is-bwyllgorau ar wahoddiad.

Bydd mynychwyr rheolaidd eraill hefyd yn cynnwys:

• Llywodraeth Cymru (sydd hefyd yn cymryd rôl yr Ysgrifenyddiaeth)
• Swyddogion Awdurdod Tân ac Achub (fel ymgynghorwyr i Aelodau Awdurdod Tân ac Achub)
• Cynghorwyr Pensiwn Cymdeithas Llywodraeth Leol
• Adran Actiwari'r Llywodraeth (yn ôl gwahoddiad pan fo angen)

Dirprwyo

Dylai aelodau’r bwrdd wneud pob ymdrech i fod yn bresennol mewn cyfarfodydd. Os nad yw hyn yn bosibl, gellir trefnu dirprwy gyda chaniatâd blaenorol y Cadeirydd.

Mae aelodau’r Bwrdd yn cynrychioli naill ai gyflogwyr neu gyflogeion, yn unol â rheoliadau’r cynllun. Ni all unrhyw aelod na pherson sy’n dirprwyo dros aelod gynrychioli cyflogwr yn ogystal â chyflogeion mewn unrhyw gyfarfod.

Rhaid i gynrychiolwyr aelodau allu dangos eu gallu i fynychu a chwblhau’r gwaith paratoi angenrheidiol ar gyfer cyfarfodydd a chymryd rhan mewn hyfforddiant yn ôl y gofyn.

Gwrthdaro buddiannau

Rhaid i aelodau Bwrdd Cynghori Cynllun Pensiwn Diffoddwyr Tân Cymru roi gwybod yn ysgrifenedig ar unwaith i Weinidogion Cymru (trwy Ysgrifenyddiaeth y Bwrdd) am unrhyw wrthdaro buddiannau posibl a allai fod ganddynt. Serch hynny, nid yw bod yn aelod o Gynllun pensiwn diffoddwyr tân 2015 (neu o unrhyw Gynllun cysylltiedig) yn ei hun yn gyfystyr â gwrthdaro o’r fath.

Gan nad yw’r Bwrdd yn meddu ar unrhyw awdurdod i wneud penderfyniadau, nid oes cworwm ganddo. Serch hynny, mae’r holl aelodau neu eu dirprwyon enwebedig yn cael eu hannog yn gryf i fynychu. Os cred y Cadeirydd nad yw’r bobl sy’n bresennol yn cynrychioli’n llawn ac yn deg yr ystod o safbwyntiau a allai fodoli ymhlith y cyflogwyr neu’r cyflogeion yn eu cyfanrwydd, gall ddod â’r cyfarfod i ben.

Bydd y Cadeirydd yn ceisio sicrhau cytundeb ar yr holl faterion. Os na lwyddir i wneud hynny, dylai’r holl gyngor a ddarperir gan y Bwrdd adlewyrchu unrhyw safbwyntiau anghytunus ymhlith ei aelodau a dylai’r Cadeirydd eu cofnodi.

Fel arfer, bydd Bwrdd Cynghori’r Cynllun yn cwrdd dair gwaith y flwyddyn, er efallai y bydd angen cyfarfodydd yn fwy rheolaidd o bryd i’w gilydd (i drafod materion sy’n ymwneud â phrisio’r cynllun er enghraifft). Gall fod amgylchiadau lle y bydd angen trefnu cyfarfodydd ar fyr rybudd (cwpwl o wythnosau). Caiff cyfarfodydd o’r math hwn eu trefnu yn ôl disgresiwn y Cadeirydd.

Hyd y cyfarfodydd fydd oddeutu 2 awr (yn unol ag eitemau’r agenda); mae croeso i aelodau’r Grŵp gysylltu â’r ysgrifenyddiaeth rhwng cyfarfodydd os ydyn nhw am gynnig mater i’w gynnwys ar yr agenda.

Fel arfer, cynhelir y cyfarfodydd yn rhithwir dros Teams, ond gall fod adegau pan fydd yn ofynnol cynnal cyfarfodydd wyneb yn wyneb yn Swyddfeydd Llywodraeth Cymru neu mewn lleoliadau eraill ledled Cymru.

Bydd disgwyl i aelodau fynychu hyfforddiant a ddarperir gan y Bwrdd o bryd i’w gilydd. Dyma fydd y sefyllfa yn enwedig cyn i’r Bwrdd gynnal trafodaethau a rhoi cyngor i Weinidogion Cymru ynghylch prisiad y cynllun. Gellir cynnal hyfforddiant fel rhan o gyfarfod a drefnwyd neu fel digwyddiad ar wahân.

Yn unol ag ymrwymiad Llywodraeth Cymru i fod yn agored, byddwn yn cyhoeddi ein cofnodion ar ein gwefan cyn gynted â phosibl ar ôl y cyfarfod perthnasol. Mae croeso i aelodau rannu’r papurau gyda’u Byrddau Pensiwn lleol, er y gall achlysuron godi pan na fydd hyn yn briodol. Pe digwydd achlysuron o’r fath, bydd y Cadeirydd yn rhoi gwybod i aelodau beidio â’u datgelu.

Efallai y bydd yn briodol sefydlu is-grwpiau er mwyn ystyried materion penodol. Bydd is-grwpiau’n gweithredu ar sail ‘yn ôl y gofyn’ gan fod yn atebol i Fwrdd Cynghori’r Cynllun.