Arolwg Deiet a Maeth Cenedlaethol: canlyniadau blynyddoedd 1 i 9

Cyfraddau bwyta bwyd, cymeriant maethynnau a statws maethol o’i gymharu â’r argymhellion (Blynyddoedd 5 i 9; 2012/13 i 2016/17)

• Roedd cyfraddau bwyta 5 Dogn y Dydd o ffrwythau a llysiau yn is na’r argymhelliad ym mhob grŵp oedran/rhyw.
• Nid oedd y mwyafrif llethol o blant ac oedolion yn dilyn y canllawiau a argymhellir ar gymeriant siwgrau rhydd.
• Roedd y gyfradd ddyddiol gyfartalog o ran bwyta cig coch a chig wedi’i brosesu yn uwch na’r uchafswm a argymhellir ar hyn o bryd ar gyfer oedolion.
• Nid oedd y mwyafrif llethol ym mhob grŵp oedran yn dilyn yr argymhellion ar gyfer ffeibr.
• Roedd tystiolaeth bod cymeriant nifer o fitaminau a mwynau yn isel.

Tueddiadau dros amser (Blynyddoedd 1 i 9; 2008/09 i 2016/17)

• Ar y cyfan, roedd tueddiadau dros amser yng Nghymru yn debyg i’r rhai a welir yn y DU ar y cyfan.
• Ychydig o newid a fu mewn cymeriant ffrwythau a llysiau a chymeriant ffeibr dros y cyfnod o naw mlynedd.
• Roedd cymeriant cig coch a chig wedi’i brosesu yn dangos tuedd ar i lawr dros amser. Gwelwyd tuedd ar i lawr hefyd yn y gyfran o bobl ifanc a oedd yn yfed diodydd ysgafn siwgrog.
• Cafwyd gostyngiad yng nghyfanswm cymeriant braster fel cyfran o egni bwyd ar gyfer dynion hŷn yng Nghymru. Roedd y gostyngiad hwn yn fwy na’r gostyngiad a welwyd yn y DU ar y cyfan.
• Roedd tuedd tuag i lawr ar gyfer y rhan fwyaf o fitaminau a mwynau ar gyfer nifer o grwpiau oedran/rhyw.
• Roedd tuedd tuag i lawr mewn cymeriant sodiwm.
• O ran statws ffolad, roedd gostyngiad ym mhob grŵp oedran. Roedd y gostyngiad mewn statws ffolad ymysg menywod o oedran geni plant yn y DU yn llai amlwg yng Nghymru.

Incwm aelwydydd ar sail cyfrif cyfwerthedd (Blynyddoedd 5 i 9; 2012/13 i 2016/17)

• Fel ag yn achos y DU ar y cyfan, roedd incwm uwch yn gysylltiedig â statws maethol gwell ar draws ystod o fiofarcwyr.
• Roedd tystiolaeth bod cymeriant ffrwythau a llysiau a physgod olewog yn cynyddu gydag incwm cynyddol.
• oedd cymeriant siwgrau rhydd fel cyfran o gyfanswm egni yn gostwng yn sylweddol gydag incwm cynyddol ar gyfer oedolion 19 i 64 oed.
• Nid oedd unrhyw batrwm cyson ar draws grwpiau oedran/rhyw o ran cyfanswm cymeriant braster ac asidau brasterog dirlawn fel cyfran o egni mewn perthynas ag incwm.