Workplace recycling

Mae ailgylchu yn y gweithle wedi newid

Mae'n gyfraith i bob busnes, elusen a sefydliad sector cyhoeddus i sortio eu gwastraff er mwyn ei ailgylchu.

Mae'r gyfraith hefyd yn berthnasol i'r holl gasglwyr a phroseswyr gwastraff a deunydd ailgylchu sy'n rheoli gwastraff gweithleoedd sy'n debyg i wastraff cartrefi.

Cyflwynodd Llywodraeth Cymru y newidiadau hyn i wella ansawdd y ffordd rydym yn casglu a gwahanu gwastraff a chynyddu'r gwaith hwn.

Ysbytai GIG ac ysbytai preifat yw'r unig weithleoedd sy’n cael mwy o amser i gydymffurfio â'r gyfraith newydd; o 6 Ebrill 2026.

Sut i wirio eich bod yn didoli eich gwastraff yn gywir

Darllenwch y canllaw cyffredinol.   

Mae gwefan Y Busnes o Ailgylchu WRAP Cymru yn cynnwys canllawiau ar gyfer sectorau penodol gan gynnwys:

• Lletygarwch a bwyd 
• Manwerthu 
• Addysg gan gynnwys meithrinfeydd, ysgolion a phrifysgolion 
• Lleoliadau preswyl gan gynnwys cartrefi nyrsio, cartrefi gofal preswyl a charchardai 
• Digwyddiadau awyr agored fel ffeiriau, gwyliau a chyngherddau 
• Cyfleusterau hamdden ac adloniant gan gynnwys meysydd carafanau, gwersylloedd, a gwestai. 

Mae posteri, arwyddion a thempledi hefyd ar gael ar wefan Y Busnes o Ailgylchu WRAP Cymru. 

Mae'r Cod Ymarfer yn rhoi gwybodaeth fanylach i chi am y gyfraith ailgylchu newydd yn y gweithle a sut y dylid cydymffurfio. Mae'n bwysig eich bod yn darllen hyn ochr yn ochr â'r canllawiau.

Pa wastraff sydd angen ei wahanu

Dylid gwahanu'r deunyddiau canlynol i'w casglu ar wahân:

• Bwyd
• Papur a cherdyn
• Gwydr
• Metelau, plastig a chartonau
• Tecstilau sydd heb eu gwerthu
• Cyfarpar trydanol ac electronig gwastraff bach sydd heb eu gwerthu (sWEEE)

Cewch gymysgu papur a cherdyn gyda’i gilydd yn yr un cynhwysydd, a gallwch gymysgu plastig, a chartonau gyda’i gilydd.

Mae gwaharddiad hefyd ar:

• Anfon unrhyw wastraff bwyd (o ba faint bynnag) i garthffosydd
• Gwastraff a gesglir ar wahân sy'n mynd i beiriannau llosgi a safleoedd tirlenwi
• Pob gwastraff pren sy'n mynd i safleoedd tirlenwi

I bwy mae'r gyfraith yn berthnasol

Mae angen i bob busnes, elusen a sefydliad sector cyhoeddus wahanu eu gwastraff.
Mae’r rhain yn cynnwys, er enghraifft:

• Safleoedd amaethyddol
• Lletygarwch a thwristiaeth - bwytai, bariau, tafarndai, gwasanaethau gwely a brecwast, gwestai, gwersylloedd a pharciau carafanau, llety gwyliau, a safleoedd trwyddedig
• Meysydd sioe
• Gorsafoedd gwasanaeth a gorsafoedd petrol
• Lleoliadau adloniant a chwaraeon gan gynnwys canolfannau hamdden
• Trafnidiaeth - gorsafoedd bysiau, gorsafoedd rheilffordd, porthladdoedd, meysydd awyr a hofrenfeydd
• Cartrefi gofal a nyrsio
• Fferyllfeydd, meddygfeydd, deintyddfeydd, a lleoliadau gofal sylfaenol eraill
• Safleoedd adeiladu
• Ffatrïoedd a warysau
• Garejis ceir
• Addysg - prifysgolion, colegau ac ysgolion
• Canolfannau garddio
• Adeiladau treftadaeth
• Llyfrgelloedd ac amgueddfeydd
• Swyddfeydd a gweithdai
• Mannau addoli
• Carchardai
• Marchnadoedd a gwyliau yn yr awyr agored
• Manwerthu

Pam mae'r gyfraith wedi newid 

Rydym am wella ansawdd y gwaith ailgylchu a chynyddu faint sy’n cael ei ailgylchu o weithleoedd. Mae hwn yn gam pwysig arall tuag at fod yn ddiwastraff, lleihau ein hallyriadau carbon a mynd i’r afael â’r argyfwng hinsawdd.

Rydym am barhau i ddefnyddio deunyddiau cyhyd ag y bo modd. Gyda chostau deunyddiau yn codi, bydd parhau i ddefnyddio deunyddiau o ansawdd uchel yn helpu ein heconomi ac yn cefnogi ein cadwyni cyflenwi. 

Ni yw'r gorau eisoes yn y DU ar gyfer ailgylchu domestig a'r ail orau yn y byd.

Mae'r rheoliadau yn cefnogi'r camau gweithredu o strategaeth economi gylchol Llywodraeth Cymru Mwy nag ailgylchu.