Adolygiad o effaith tarfu mawr ar les a iechyd meddwl plant a phobl ifanc

Cynhaliwyd yr adolygiad hwn o lenyddiaeth fel asesiad cyflym o’r dystiolaeth, ac ar ôl ystyried y llenyddiaeth a oedd ar gael, dyma oedd y canfyddiadau.

Prif ganfyddiadau

Datgelodd y gwaith ymchwil rhyngwladol ar COVID-19 fod y pandemig a’r angen i hunanynysu gartref wedi newid ymddygiad plant, ac wedi arwain at gynnydd yn symptomau iselder a gorbryder, yn ogystal â mwy o anawsterau o ran ymddygiad a phoeni. Fodd bynnag, canfu rhai astudiaethau ganlyniadau cadarnhaol hefyd, megis helpu ac ystyried eraill.

Mae ymchwil y DU o ran COVID-19 yn awgrymu bod y pandemig yn effeithio’n andwyol ar iechyd meddwl plant a phobl ifanc, a bod adroddiadau gan blant a rhieni yn dynodi pryderon plant mewn perthynas â COVID-19. Mae rhywfaint o waith ymchwil yn awgrymu’r canlynol fel rhai o’r ffactorau sy’n creu risg fwy ymhlith plant: tlodi, anawsterau iechyd meddwl blaenorol ac anghenion addysgol ychwanegol. Awgrymwyd bod y risg yn uwch hefyd i blant hŷn.

Mae gwaith ymchwil yn sgil trychinebau rhyngwladol yn dangos bod plant oedran ysgol sydd wedi’u heffeithio gan drychinebau (ee daeargrynfeydd, corwyntoedd neu dornados) yn aml yn dioddef anawsterau iechyd meddwl, yn benodol anhwylder neu symptomau straen ôl-drawmatig, ac iselder. Awgrymir y canlynol fel rhai o’r ffactorau sy’n creu risg fwy ymhlith plant: effaith fawr yn sgil y drychineb, cael eu gadael ar eu pen eu hunain, lles ac iechyd meddwl rhieni, ac iechyd meddwl blaenorol y plant. Awgrymwyd bod y risg yn uwch hefyd i blant hŷn.

Canfuwyd bod y ffactorau canlynol yn gallu lleihau problemau iechyd meddwl plant a phobl ifanc yn dilyn trychineb: sgiliau gwybyddol da a strategaethau ymdopi, cydgefnogaeth gymunedol a chymorth cymdeithasol gan rieni a chyfoedion. Yn aml, byddai ymyriadau i fynd i’r afael â phroblemau iechyd meddwl yn digwydd ar lefel ysgol gyfan, a phrofwyd eu bod yn llwyddiannus. Canfuwyd bod ymyriadau eraill megis Therapi Gwybyddol Ymddygiadol yn lleihau anhwylder straen ôl-drawmatig ac iselder ymhlith plant a phobl ifanc.